नेपाल प्रिमियर लिगका लागि स्कटिस ब्याटिङ अलराउन्डर ब्रेन्डन म्याकमुलन नेपाल आइपुगेका छन् ।

म्याकमुलनलाई सुदूरपश्चिम रोयल्सले अनुबन्ध गरेको छ । शुक्रबार आइपुगेका म्याकमुलनलाई टोलीका व्यवस्थापक रवि तिमल्सिनालगायतले स्वगत गरेका थिए ।म्याकमुलनले १६ ट्वान्टी-२० अन्तर्राष्ट्रियमा ६ अर्धशतकसहित ४९७ रन बनाएका छन् । उनको नाममा दुई विकेट पनि छ ।

म्याकमुलन नेपाल आइपुगे सुदूरपश्चिमका तेस्रो खेलाडी हुन् । न्युजिल्यान्डका स्कट कुग्गेलिजन र  इङ्ल्यान्डका सैफ अली जैब यसअघि नै नेपाल आइपुगिसेका छन् ।राष्ट्रिय टोलीका अलराउन्डर दीपेन्द्रसिंह ऐरी मार्की खेलाडी रहेका सुदूरपश्चिमको मुख्य प्रशिक्षकमा जगत टमाटा छन्। यसैगरी टोलीले अस्ट्रेलियाका ब्राड हजलाई मेन्टरका रूपमा नियुक्त गरेको छ । नेपाल क्रिकेट संघ (क्यान) को आयोजनामा एनपिएल मंसिर १५ देखि पुस ६ गतेसम्म हुँदैछ ।

प्रतियोगितामा आठ फ्रेन्चाइज टोलीको सहभागिता रहनेछ । लिगमा सुदूरपश्चिमसँगै पोखरा एभेन्जर्स, जनकपुर बोल्ट्स, काठमाडौं गुर्खाज, चितवन राइनोज, विराटनगर किंग्स, कर्णाली याक्स र लुम्बिनी लयान्सले प्रतिस्पर्धा गर्नेछन् ।