‘अब धनगढी दौडिन्छ’ को एघारौं संस्करण वैशाख १ गतेको आयोजना हुने भएको छ। ‘अब धनगढी दौडिन्छ’ हाफ म्याराथन मान्यता प्राप्त दौड प्रतियोगिता हो । चैतन्य पाठशालामा आज आयोजित पत्रकार सम्मेलनमा मुख्य प्रायोजन भएवाफत आजदेखि प्रतियोगिताको नाम चैतन्य धनगढी हाफ म्याराथन २०२५ रहने आयोजक धनगढी जेसिजले जानकारी दिएको छ ।

धनगढी जेसिजका प्रतियोगिता संयोजक दीपक गौतम र चैतन्य पाठशालाका अध्यक्ष गणेश प्रसाद जोशीले हिजो ९सोमबार० सम्झौता पत्रमा हस्ताक्षर गरेका थिए । चैतन्य धनगढी हाफ म्याराथन २०२५ मुख्य प्रायोजन भए वाफत चैतन्य पाठशालाले १ हजार थान टिसर्ट र नगद ७५ हजार प्रथम पुरस्कार वाफत प्रदान गर्ने सम्झौता पत्रमा उल्लेख गरिएको छ ।

धनगढी जेसिजले सन् २०१४ देखि नयाँ वर्षको अवसर पारेर धनगढीको समग्र विकासका लागि अब धनगढी दौडिन्छ भन्ने नाराका साथ हाफ म्याराथन प्रतियोगिता आयोजना गर्दै आईरहेको बताउदै धनगढी जेसिजका अध्यक्ष लोकराज भट्टले मुख्य प्रायोजक भएर साथ दिएकोमा चैतन्य पाठशाला परिवारप्रति आभार ब्यक्त गरे ।

चैतन्य पाठशाला अध्यक्ष जोशीले युवाहरुद्वारा आयोजना भैरहेको ुचैतन्य धनगढी हाफ म्याराथन २०२५ु प्रतियोगितामा जोडिन पाउदा निकै खुशी लागेको बताए । उनले पाठशालाले अहिल्लो बर्ष समेत १ हजार थान टिसर्ट उपलब्ध गराएको बताउदै युवाहरुद्वारा आयोजना हुने सकारात्मक जुनसुकै प्रतियोगितामा आफुले पाठशालाको तर्फबाट सक्दो सहयोग गर्ने बताए । धनगढी हाफ म्याराथन धनगढी चौराहादेखि सुरु भएर गेटा मेडिकल कलेजको मनेहरा पुलको मोड हुँदै पुनः धनगढी चौराहामा पुगेर समापन हुने प्रतियोगिताका संयोजक दीपक गौतमले बताए ।

संयोजक गौतमले हाफ म्याराथनको विजेताले ७५ हजार, उपविजेताले ५० हजार र तेस्रो हुनेले नगद २५ हजार रुपैयाँ प्राप्त गर्ने बताए । त्यस्तै प्रतियोगिता अन्तर्गत महिलातर्फ तथा कर्पोरेट र पत्रकारका लागि ५ किलो मिटरको दौड पनि आयोजना गरिने संयोजक गौतमले बताए । दुई वटै विधाका विजेताले नगद ७ हजार ५ सय, उपविजेताले नगद ५ हजार र तेस्रो हुनेले नगद २ हजार ५ सय प्राप्त गर्ने संयोजक गौतमले बताए।