कैलालीमा मास्क प्रयाग नगरी सडकमा निस्कने चार हजार जनाभन्दा बढीलाई प्रहरीले कारवाही गरेको छ । गृह मन्त्रालयले प्रहरी प्रधान कार्यालयलाई मास्क अनिवार्य गर्नेबारे निर्देशन गरेसँगै मास्क नलगाई सडकमा आउनेलाई कारवाही थालिएको हो ।

कैलालीमा बिहीबार एक हजार पचास, शुक्रबार एक हजार पाँच सय ३७  र शनिबार एक हजार पाँच सय बढीलाई कारबाही गरिएको प्रहरी नायब उपरीक्षक प्रतिक विष्टले बताए । मास्क नलगाई हिँड्नेलाई होल्ड गरेर सम्झाई बुझाई गरेर छोड्ने गरेको बताए । अहिलेलाई जरिवाना नगरी मास्क लगाउन र दूरी कायम गर्न अनुरोध गर्ने गरिएको विष्टले बताए । जिल्लामा कोरोनाबाट बच्ने उपायबारे जनचेतनाका लागि  माइकिङ समेत गरिरहेको उनले बताए ।