बाजुराको बुढीगंगा नगरपालिका अम्कोटमा गएको पहिरोमा पुरिएर बेपत्ता भएका एक युवकको शव फेला परेको छ । मङ्गलवार गएको पहिरोमा बेपत्ता भएका स्थानीय २२ वर्षीय धर्मराज पाध्याको शव शुक्रबार बिहान फेला परेको सहायक प्रमुख जिल्ला अधिकारी समीर भण्डारीले जानकारी दिए । साँफे मार्तडी सडक खण्डमा पर्ने अम्कोटमा पहिरोमा पुरिएर उनी बेपत्ता भएका थिए । पहिरोमा बेपत्ता भएदेखि नै पाध्याको नेपाली सेना,सशस्त्र प्रहरी,नेपाल प्रहरी र स्थानीयले खोजी गरिरहेका थिए । सोही पहिरोमा परी स्थानीय हरेन्द्र पाध्याय र ज्ञानराज पाध्याय घाइते भएका थिए । उनीहरु दुबै जना निको भएर घर फर्किएका सहायक प्रमुख जिल्ला अधिकारी भण्डारीले बताए ।