कोभिड–१९ का कारण नियमित अन्तर्राष्ट्रिय हवाई उडान बन्द भएको अवस्थामा सुुदुरपश्चिमका एक हजार तीन सय वढी लकडाउनको बेला तेस्रो मुलुकबाट स्वदेश फर्किएका छन् । साउन ३० गतेसम्म स्वदेश फर्किएका ५१ हजार ४ सय ४१ जना मध्ये सुदुरपश्चिम प्रदेशका एक हजार तीन सय १९ जना रहेको कोभिड–१९ संकट व्यवस्थापन केन्द्र (सीसीएमसी) ले जनाएको छ । यो संख्या कर्णाली प्रदेशपछि पुछारबाट दोस्रो हो । कर्णाली प्रदेशमा सवैभन्दा कम एक हजार एक सय ७७ जना तेस्रो मुलुकबाट घर फर्किएका छन् ।
यो तथ्याङ्क कोभिड–१९ महामारीपछि भारत बाहेक तेस्रो देशबाट त्रिभुवन अन्तर्राष्ट्रिय विमानस्थल हुँदै स्वदेश फर्किएकाको हो । कोरोना भाइरसका कारण भारतबाट फर्कनेको तथ्याङ्क यकिन छैन । सरकारले गएको जेठ २३ गतेदेखि चार्टर्ड उडान मार्फत विदेशमा अलपत्र परेका नागरिकलाई स्वास्थ्य सुरक्षाका मापदण्ड पालना गरी स्वदेश फर्कन दिने निर्णय गरेको थियो ।
सवैभन्दा बढी १४ हजार २ सय ५७ बाग्मती प्रदेशका घर फर्किएको कोभिड–१९ संकट व्यवस्थापन केन्द्र (सीसीएमसी) ले जनाएको छ । त्यसैगरी प्रदेश नम्बर १ का १० हजार ८८३, प्रदेश नम्बर ५ का आठ हजार ५९८, प्रदेश नम्बर २ का आठ हजार ५०६, गण्डकी प्रदेशका छ हजार ७०१ जना स्वदेश फर्केका हुन् ।
लकडाउनको अवधिमा विभिन्न ३० देशबाट नेपाली स्वदेश फर्किएको तथ्याङ्क छ । संयुक्त अरब इमिरेट्स (यूएई) बाट हालसम्म सबैभन्दा बढी १४ हजार ३१४ नागरिक स्वदेश फिरेका छन् । यस्तै साउदी अरेबियाबाट सात हजार ८१७, मलेशियाबाट सात हजार ६४२, कुवेतबाट छ हजार ३२९, कतारबाट छ हजार १९१, बहराइनबाट ९८०, दक्षिण कोरियाबाट ९६७, अष्ट्रेलियाबाट ९४३, ओमानबाट ८११ र माल्दिभ्सबाट ७०९ जना स्वदेश फर्केका सीसीएमसीले जनाएको छ ।
सम्बन्धित वर्गका समाचारहरू
