आगामी असोज १ गतेदेखि यातायात व्यवसायीहरुले सबै सार्वजनिक सवारी साधन सञ्चालन गर्ने भएका छन् । सरकारले कोरोना नियन्त्रणका नाममा सार्वजनिक यातायात संचालनलाई निषेध गरेका बेला सुदूरपश्चिमका यातायात व्यवसायीले भने असोज १ गतेदेखि पूर्ण रुपमा यातायात सञ्चालन गर्ने भएका हुन् ।
१ गतेदेखि सार्वजनिक यातायात पूर्ण रुपमा सञ्चालन गर्ने तयारी भईरहेको सुन्दर सुदूरपश्चिम यातायात प्रालिका अध्यक्ष पदम सापकोटाले बताए । उनले लामो तथा छोटो दूरीका यातायात चलाउने केन्द्रमा समेत तयारी भईरहेको बताउँदै सुदूरपश्चिममा पनि सोही अनुसार यातायात सञ्चालन हुने बताए । कोरोना प्रभावपछि जारी लकडाउन र निषेधाज्ञाका कारण सूरपश्चिमका यातायात व्यवसायी मारमा परेका छन् ।
गत चैत ११ गतेदेखि जारी एक सय २० दिन लामो लकडाउन र अहिले स्थानीय प्रशासनले घोषणा गरेको निषेधाज्ञाका कारण यातायात व्यवसायी मारमा परेका हुन् । ६ महिनादेखि सार्वजनिक यातायात ठप्प भएपछि सयौँ व्यवसायीसंगै हजारौं मजदुर पनि समस्यामा परेको कर्णाली रिभर साईड यातायात प्रालीका अध्यक्ष धिरज शाहीले बताए ।
‘कतिपय यातायात व्यवसायीहरुले आफ्नै लगानीमा सवरी संञ्चालन गरेको भएपनि धेरै जसोले भने बैंकबाट ऋण निकालेर र किस्तामा बसहरु खरिद गरेका छन्,’ उनले भने, ‘सार्वजनिक सवारी साधन नियमित रुपमा संञ्चालन भएपछि मात्रै बैंकको ब्याज र गाडीको किस्ता तीर्न सहज हुनेछ ।’
कैलालीमा भने जिल्लाभित्र मात्रै जोरविजोर प्रणाली लागु गरेर सार्वजनिक सवारी साधान संञ्चालन गर्न अनुमति दिईएको छ । ५० प्रतिशत मात्रै यात्रु बोक्न पाउने गरि सार्वजनिक सवारी संञ्चालन गर्न पाईने भनिएको हो । तर जोरविजोर प्रणाली लागु भएपछि कम सवारी साधन चल्ने भएका कारण भिडभाड भने बढी हुने गरेको छ ।
सम्बन्धित वर्गका समाचारहरू
