धनगढीको फाप्ला क्रिकेट मैदानमा गाई धपाउँदै क्रिकेट अभ्यास
2020/11/09, 7:44
 
fapla

क्रिकेटको शहर भन्ने पहिचान पाएको धनगढी अहिले सुस्ताएको छ । धनगढीको चिनारी बनेको धनगढी प्रिमियर लिग (डिपिएल) आयोजना नभएको दुई वर्ष भयो । २०७६ सालको डिपिएल दक्षिण एसियाली खेलकुद र अन्तर्राष्ट्रिय क्रिकेटका कारण आयोजना हुन सकेन । यस वर्ष कोरोना भाइस (कोभिड–१९) का कारणले आयोजना हुने सम्भावना कम छ ।

दुई वर्षअघिको डिपिएल प्रस्तावित अन्तर्राष्ट्रिय फाप्ला क्रिकेट मैदानमा भएको थियो । यो मैदान अहिले अस्तव्यस्त अवस्थामा छ । संघ, प्रदेश र स्थानीय तह सहित तीन तहका सरकार भए पनि मैदानको स्वामित्व कसको भन्ने टुङ्गो नलाग्दा मैदान फेरि पुरानै अवस्थामा फर्किने डर छ । शनिबार मध्याह्न फाप्ला क्रिकेट मैदानमा धनगढी क्रिकेट एकेडेमीका खेलाडीहरू अभ्यास गरिरहेका थिए ।

4

मैदानमा खेलाडीभन्दा धेरै गाइवस्तु र बाख्रा थिए । यो आजको मात्रै समस्या होइन, एक वर्षयता फाप्ला मैदानमा खेलाडीभन्दा बढी गाईवस्तु नै देखिने गरेका छन् । पछिल्लो डिपिएलयता फाप्ला मैदानमा ठूलो प्रतियोगिता हुन सकेको छैन । डिपिएलमा लाखौँ रुपैयाँ खर्च गरेर बनाएको पिच अहिले पुरानै अवस्थामा पुगेको छ । गत वर्ष दक्षिण एसियाली खेलकुद (साग) का कारणले क्यालेन्डर व्यवस्थापन गर्न नसक्दा रोकिएको डिपिएल यो वर्ष पनि हुने सम्भावना न्युन छ ।

कोरोना भाइरसको मारमा परेको नेपाली खेलकुद अहिले सञ्चालन गर्न निकै कठिन भएको जानकार बताउँछन् । यस्तोमा घरेलु लिग गर्न आयोजकलाई पनि समस्या भएको छ । धनगढी क्षेत्रमा रहेका खेलाडीहरू आफ्नै पहलमा अहिले फाप्ला मैदानमा क्रिकेट अभ्यास गरिरहेका छन् । एकेडेमीका केही खेलाडी अभ्यासका लागि दैनिक फाप्ला पुग्छन् । आफूले जाने अनुसार अभ्यास गर्छन् । कुनै बेला मैदान भित्र रहेका गाईवस्तु पिचबाटै हिँडिदिन्छन् । खेलाडीहरू गाईवस्तु धपाउँछन् र फेरि खेल्छन् ।

अभ्यासका लागि राष्ट्रिय महिला क्रिकेट टोलीकी खेलाडी कविता कुँवर, यु १९ महिला टोलीकी लक्ष्मी साउँद सहित पुरुषतर्फ सुदूरपश्चिम प्रदेशबाट प्रतिनिधित्व गर्ने खेलाडीहरू मैदान पुग्छन् । राज्यको ठूलो लगानीमा स्तरोन्नति भएको फाप्ला क्रिकेट अहिले अस्तव्यस्त भएको देख्दा खेलाडीहरू दुःखी हुन्छन् ।

यु १९ राष्ट्रिय महिला टोलीकी खेलाडी लक्ष्मीले मैदानको व्यथा यसरी सुनाइन— हामी पनि घरमै थियौँ । यहाँ सामुदायिक मैदान अस्तव्यस्त थियो । हामीले सल्लाह गरेर यहाँ अभ्यास गर्ने निर्णय गर्यौं । अहिलेसम्म अभ्यास गरिरहेका छौँ । कोच सहभागी हुनुभएको छैन तर पनि हामी आफ्नो अनुभवको आधारमा अभ्यास गरिरहेका छौँ । मैदानको अवस्था देखेर दुःख लाग्छ । यहाँ ठूलो लगानी भएको छ । अन्तर्राष्ट्रिय मैदान बनाउने भनिसकेपछि फाप्लाका लागि विनियोजन भएको बजेट फ्रीज भएको छ ।  अहिले खेल्न मिल्नेसम्म बनेको छ तर दुई महिनाअघि त यतिको पनि थिएन । घाँस ठूलो भएको थियो । गाईवस्तु र बाख्रामात्रै हुन्थे ।

1

यति ठूलो मैदान भएर पनि खेलाडीलाई अभ्यास गर्न कठिन छ । फिल्डमा अहिले पनि खाल्डाखुल्डी देखिन्छन् । खेलाडीका लागि कुनै व्यवस्था भएको छैन । सरकारले कोरोनाकालमा नखेल्नू भन्छ । हामीले आफ्नो भविष्य सोचेर आफ्नै तरिकाले अभ्यास गर्दैछौँ । सुरुमा हामीले यहाँको घाँस काट्यौँ अनि पिच सुधार गयौँ । हामी आफैँले रोलर लगायौँ । पिच त घरको आँगन जस्तै भइसकेको थियो । हरेक दिन अभ्यास अगाडि रोलर लगाउँछौँ । अहिले अभ्यासमा १२–१४ जना अनियमित छौँ । आफूलाई फिट राख्ने प्रयास गरिरहेका छौँ ।