धनगढी उप–महानगरपालिका वडा नम्वर १४ का दुई जना कोरोना संक्रमितलाई उनीहरुका परिवारका सदस्यहरुसँगै राखिएको छ । विहीवार कोरोना पुष्टि भएका २२ बर्षीय युवती र २६ बर्षीय युवकलाई उपचारका लागि अस्पताल नलगिएको हो । कोरोना पुष्टि भएपछि उनीहरुलाई छुट्टै राख्नुपर्ने भएपनि विहीवार रातभरी परिवारका अन्य सदस्यहरुसँगै राखिएको संक्रमितहरुका परिवारका सदस्यहरुको गुनासो रहेको छ ।
दुबै संक्रमित १४ दिनअघि भारतको दिल्लीबाट एउटै गाडीमा आएर धनगढी उप–महानगरपालिका फुलवारीको पञ्चोदय माविको क्वारेन्टिनमा परिवार सहित एउटै कोठामा बसेका थिए । संक्रमित महिलाका श्रीमान र छोरा तथा संक्रमित पुरुषकी श्रीमती र २७ दिने छोरी एउटै कोठामा बस्दै आएकोमा कोरोना पुष्टि भएपछि पनि अलग नराखेर सँगै राखिएको छ । संक्रमित महिलाका तीन बर्षीय छोरालाई भने घर पठाईएको छ ।
धनगढी उप–महानगरपालिका वडा नम्वर १४ का वडा अध्यक्ष रामबजारी चौधरीले संक्रमित दुवै जना परिवारका सदस्यसंगै रहेको स्वीकार गरे । उनले उनीहरुलाई अस्पताल लैजान एम्बुलेन्स नआएको बताए । विद्यालय भरिभराउ भईसकेकोले फरक–फरक कोठामा पनि राख्न नसकिएको वडाध्यक्ष चौधरीले बताए । संक्रमित लैजाने एम्बुलेन्स अहिले हसुलिया गएको र त्यहाँबट आएपछि अस्पताल ल्याईने उनले जानकारी दिए ।
