प्रधानमन्त्री कप सिनियर पुरुष राष्ट्रिय क्रिकेट प्रतियोगिताको लागि सुदूरपश्चिम प्रदेशस्तरीय छनौटको खेलतालिका सार्वजनिक गरिएको छ। सार्वजनिक खेलतालिकाअनुसार छनौट प्रतियोगिता पुस १४ गतेदेखि कञ्चनपुरको महेन्द्रनगरमा सुरु हुनेछ।
सुदूरपश्चिम प्रादेशिक क्रिकेट संघका सचिव तेजप्रकाश भट्टका अनुसार सहभागी हुने ८ टोलीलाई दुई समूहमा विभाजन गरिएको छ। समूह ए मा अछाम, डडेल्धुरा, कञ्चनपुर र दार्चुला रहेका छन् भने समूह बी मा बैतडी, कैलाली, बझाङ र डोटी रहेका छन्।
प्रतियोगिता अन्र्तगत पुस १४ गते पहिलो खेलमा कञ्चनपुर र डडेल्धुरा भिड्दा दोस्रो खेलमा अछाम र दार्चुला भिड्नेछन्। पुस १५ गते अछाम र डडेल्धुरा र अर्को खेलमा कञ्चनपुर र दार्चुला भिड्नेछन्। पुस १६ गते पहिलो खेलमा दार्चुला र डडेल्धुरा आमनेसामने हुँदा दोस्रोमा कञ्चनपुर र अछामबीच खेल हुनेछ। पुस १७ गते बैतडी र डोटी भिड्दा अर्को खेलमा कैलाली र बझाङ प्रतिस्प्रर्धा गर्ने सुदूरपश्चिम प्रादेशिक क्रिकेट संघले जनाएको छ।
यसका साथै पुस १८ गते पहिलो खेलमा कैलाली र डोटी भिड्दा दोस्रोमा बैतडी र बझाङ आमनेसामने हुनेछन्। पुस १९ गते कैलाली र बैतडीबीच भिडन्त हुँदा दोस्रोमा बझाङ र डोटी भिड्नेछन्। सहभागीमध्ये शिर्ष दुईमा पुग्ने टोलीबीच पुस २० गते फाइनल खेल हुनेछ। प्रदेशस्तरीय छनौट प्रतियोगिताबाट सुदूरपश्चिम प्रदेशको टोली बनाइनेछ।
टोलीले प्रधानमन्त्री कप राष्ट्रिय क्रिकेट प्रतियोगितामा सहभागिता जनाउनेछ। नेपाल क्रिकेट संघको आयोजनामा प्रधानमन्त्री कप राष्ट्रिय क्रिकेट प्रतियोगिता पुस २५ गतेदेखि काठमाडौंमा हुँदैछ।
सम्बन्धित वर्गका समाचारहरू
