काँग्रेस कैलालीको जिल्ला अधिवेशन नजिकिएसंगै चुनावी सरगर्मी बढेको छ । यहि फागुन १५ गते हुने कैलाली अधिवेशनलाई मध्येनजर गर्दै जिल्ला सभापतिका उम्मेदवार चुनावी प्रचारप्रसारमा तिव्रता दिएका छन् ।

जिल्ला सभापति पदका उम्मेदवार गणेश देउवाले अर्का उम्मेदवार नारायण भट्टलाई समर्थन जनाउँदै प्रचारप्रसारमा जुटेका छन् । धनगढी उपमहानगरपालिका वडा नम्बर १८ मा क्षेत्रीय प्रतिनिधिहरुसंगको भेटघाटमा देउवाले भट्टलाई समर्थन गरेको बताए । उनी लामो समयदेखि सभापतिको उम्मेदवार रहेको दावी गर्दै आएका थिए ।

सोही कार्यक्रममा बोल्दै नेपाली काँग्रेसका महाधिवेशन प्रतिनिधि कृष्णबहादुर महराले पनि नारायण भट्ट नै आधिकारीक उम्मेदवार रहेको बताए । जिल्ला सभापतिका उम्मेदवार नारायण भट्टले सभापति देउवा र नेतृ डाक्टर आरजु राणा देउवाको आधिकारीक उम्मेदवार रहेको दावी गरे । उनले पनि फूलवारीमा क्षेत्रीय प्रतिनिधिहरुको भेटघाट कार्यक्रममा बोल्दै सो दावी गरेका हुन् ।