नेपालले त्रिकोणात्मक टी–२० क्रिकेट प्रतियोगिताको उपाधि जितेको छ । सोमबार पपुवा न्युगिनी (पीएजनी)लाई ५० रनले हराउँदै नेपालले त्रिकोणात्मक टी–२० क्रिकेट प्रतियोगिताको उपाधि जितेको हो ।
१६८ रनको लक्ष्यसहित मैदान उत्रिएको पीएनजीले १६.१ ओभरमा सबै विकेट गुमाउँदै ११८ रनमा समेटियो ।पीएजनीलाई सस्तैमा समेट्न नेपालका दीपेन्द्रसिंह ऐरीले ४, करण केसीले ३, सन्दीप लामिछानेले २ विकेट लिए ।
टियु क्रिकेट मैदानमा पीएनजीका कप्तान असाद भालाले टस जितेर पहिला फिल्डिङ गर्ने निर्णय लिएपछि पहिले ब्याटिङ गरेको नेपालले निर्धारित २० ओभरमा ६ विकेट गुमाउँदै १६८ रन बनायो ।
नेपालका लागि दीपेन्द्रसिंह ऐरीले नटआउट ५४ रन बनाए । आजको खेलमा २१ रन पूरा गर्दै ऐरी टी–२० अन्तर्राष्ट्रियमा एक हजार रन पूरा गर्ने पहिलो नेपाली खेलाडी बनेका छन् ।
त्यस्तै, करण केसीले ३३, आशिफ शेखले २९, कुशल भुर्तेलले २५ र आदिल आलमले १५ रन बनाए ।पीएनजीका सेमो कमियाले ३, चाद सोपर, काबुआ मोरेआ र राइली हेकुरेले १–१ विकेट लिए ।
नेपाल जारी प्रतियोगितामा अपराजित रहँदै फाइनलमा पुगेको हो भने पीएनजी एक खेलमा जित निकालेर रनरेटका आधारमा फाइनलमा पुगेको थियो । नेपालले पीएनजीलाई लिगमा १५ रन र ३७ रनले पराजित गरेको थियो भने मलेसियालाई ६ विकेट र दोस्रो खेलमा ८५ रनले हराएको थियो ।
सम्बन्धित वर्गका समाचारहरू
