बैतडीको मेलौली नगरपालिका–८, कोटीगाउँको भम्ता–खोरडा मुख्यमन्त्री नमुना कृषि गाउँ नै तीन आर्थिक वर्षदेखि बाँझै रहेको छ ।लिफ्ट सिँचाइ र तरकारी खेतीका लागि तीन आर्थिक वर्षको अवधिमा दुई करोड ४३ लाख रुपैयाँ खर्च भए पनि गाउँमा तरकारी खेती त कता हो कता, पोली हाउसमा गाईबस्तु चर्छन् । गाडिएका फलामका खम्बा खिया लागेर अलपत्र छन् ।
सुदूरपश्चिम प्रदेश सरकारले मुख्यमन्त्री नमुना कृषि गाउँ कार्यक्रमका लागि कृषि ज्ञानकेन्द्र बैतडीबाट एक करोड पाँच लाख रुपैयाँ र सिँचाइ डिभिजन कार्यालय पाटन, बैतडीबाट एक करोड ३८ लाख रुपैयाँ खर्च गरे पनि गाउँमा न सिँचाइ पुगेको छ न त तरकारी खेती नै भएको छ । सिँचाइका लागि भनेर चालू आर्थिक वर्षमा थप २० लाख रुपैयाँ निकासा भएको छ । विडम्बना त के छ भने कृषि ज्ञान केन्द्र बैतडीमार्फत तीन वर्षसम्म चलेको नमुना कृषि गाउँ कार्यक्रम सफलतापूर्वक पूरा भएको प्रतिवेदन बनाएर कर्मचारी गाउँ जानै छाडेका छन् ।
गाउँमा उत्पादन भएको तरकारी राख्न सङ्कलन केन्द्रको भवनसमेत बनिसकेको अवस्थामा गाउँमा तरकारी खेती हुन नसकेको स्थानीय अशोकसिंह विष्टले बताए । उनले भने,‘नमुना कृषि गाउँ बनाउँछौँ भनेर उपभोक्ता समितिका अध्यक्ष लक्ष्मण लोहार, सदस्य बहादुरसिंह विष्ट, धनसिंह विष्टलगायतले जग्गाको लालपुर्जा सङ्कलन गरे । सुरुको वर्ष अनुगमन हुन्छ कि भनेर अलिकति टमाटर र फर्सी लगाएका थिए । त्यसपछि गाउँका किसानलाई तरकारीको बीउ नै दिइएन ।’
तर, मुख्यमन्त्री नमुना कृषि गाउँ कार्यक्रममा आर्थिक वर्ष २०७६/७७ मा ५० लाख, २०७७/७८ मा ५० लाख र आव २०७८/७९ मा पाँच लाख गरेर एक करोड पाँच लाख रुपैयाँ बजेट खर्च गरेर कार्यक्रम पूरा भएको कृषि ज्ञान केन्द्र बैतडीका निमित्त कार्यालय प्रमुख गोपालदत्त भट्टले बताए । उनले भने,‘जनसहभागिताको लगानीसमेत जोडेर करिब डेढ करोड रुपियाँको नमुना कार्यक्रम थियो । उपभोक्ताले बजेट आउने बेलासम्म काम गरेर अहिले अलत्र छोड्नु दुःखद हो।’
नमुना कृषि गाउँ कार्यक्रमको तरकारी खेतीका लागि भनेर सुदूरपश्चिम प्रदेश सरकारले सिँचाइ डिभिजन कार्यालय पाटन बैतडीमार्फत थप डेढ करोड बजेट विनियोजन गरे पनि तीन वर्षसम्म गाउँमा पानी आइपुगेको छैन ।लिफ्ट सिँचाइका लागि सिँचाइ डिभिजन कार्यालय पाटन, बैतडीबाट आर्थिक वर्ष २०७६/७७ मा ७२ लाख, २०७७/७८ मा ३६ लाख, २०७८/७९ मा ३० लाख र चालू आव २०७९/८० मा थप २० लाख रुपैयाँ बजेट आएको सिँचाइ उपभोक्ता समितिका अध्यक्ष बहादुरसिंह ठगुन्नाले बताए । उनले भने,‘सुर्नया नदीबाट पानी लिफ्ट गर्न तीन वर्षदेखि लिफ्ट सिँचाइको काम चलिरहेको छ । एक करोड ५८ लाख रुपैयाँ बजेटमध्ये सोलार पाता र पाइप खरिदमा एक करोड ४३ लाख रुपैयाँ खर्च भइसकेको र २० लाख रुपियाँ चालू आर्थिक वर्षमा खर्च हुनेछ ।’
एउटै गाउँमा राज्यले करिब अढाई करोड रुपैयाँ खर्च गर्दा पनि तरकारी खेती नभएको विषयमा लिफ्ट सिँचाइ योजनाका अध्यक्ष ठगुन्नाले भने,‘नमुना कृषि गाउँ बनाउन दुईवटा समिति गठन भएका थिए । तरकारी खेतीका लागि लक्ष्मण लोहार अध्यक्ष हुनुहुन्छ । लोहार अहिले पितृशोकमा हुनुहुन्छ । लिफ्ट सिँचाइको काम मैले गरिरहेको छु । घरमा टमाटरको बेर्ना छरेको छु । सिँचाइ पूरा हुनेबित्तिकै तरकारी खेती सुरु गर्ने सोच बनाएका छौँ ।’
सम्बन्धित वर्गका समाचारहरू
