सुदूरपश्चिम प्रदेशको बाजुरा र कर्णाली प्रदेशको मुगु जिल्ला लामो समयपछि सञ्जालमा जोडिने भएको छ। कर्णाली नदीको झोगलामा बेलिब्रिज पुल निर्माण भएपछि यी दुई जिल्ला सडक सञ्जालमा जोडिने भएको हो।

खप्तड रारा पर्यटन कोरिडोर सडकअन्तर्गत बाजुराको हिमाली गाउँपालिका बोल्डी र मुगुको खत्याड गाउँपालिकाको सुकाढिक कर्णाली नदीको झोगलामा बेलिब्रिज पुल निर्माण गरिएको छ ।  गत वर्ष २०७८ साल चैतमा बेलिब्रिजको काम सुरु भएर केही दिनमै निर्माण पूरा हुँदैछ। बाजुराको हिमाली र मुगुको खत्याड गाउँपालिका जिल्लाकै दुर्गम गाउँपालिकाका रूपमा चिनिँदै आएका छन्।

बाजुराको हिमाली गाउँपालिका फैती, बाँधु, धिमलगायतका स्थानीयले केही वर्ष पहिले गाउँमै यातायातको सुविधा लिए पनि मुगुको खत्याड गाउँपालिका सुकाढिकका स्थानीय भने यातायातको सुविधाबाट वञ्चित हुँदै आएका थिए। मुगु जिल्लाको खत्याड गाउँपालिकाका अध्यक्ष अजबहादुर शाहीले, “अबको केही समयपछि खत्याडका स्थानीयको गाडी चढ्ने सपना पूरा हुने बताए।”

उहाँले, खप्तड रारा पर्यटक कर्णाली कोरिडोर हिमाली गाउँपालिकाको धुलाचौरहुँदै बोल्डी पुगिसकेको छ। कर्णाली नदीको झोगलामा पुल नभएका कारण मुगुको खत्याडमा सडक जोडिन सकेको थिएन। बेलिब्रिज पुल निर्माण भएपछि खत्याडका केही वडामा केही दिनमै सवारीसाधन सञ्चालन हुने बताइन्छ। बाजुराहुँदै मुगु–रारासम्म पुग्ने खप्तडरारा पर्यटकीय कर्णाली कोरिडोरअन्तर्गत कर्णाली नदीको झोगलामा कर्णाली प्रदेश सरकारको तीन करोड पचास लाख रुपियाँमा ६० फिट लम्बाइमा बेलिब्रिज पुल निर्माण भएको छ।

हिमाली गाउँपालिकाले पुलको आसपासमा रहेका स्थानीयको घरटहराको मुआब्जा दिनेबाहेक पुल निर्माणका अन्य सबै रकम कर्णाली प्रदेश सरकारले उपलब्ध गराएको हो। ती घरटहराको मुआब्जा गाउँपालिकाले दिने भएको छ।

वि।सं।२०४४ पहिले कर्णाली नदीको झोगलमा पुल नहुँदा त्यहाँका स्थानीयले बाबियाको लट्ठा प्रयोग गरेर कर्णाली नदी वारपार गर्दै आएका थिए। २०४४ सालमा भने सो ठाउँमा झोलुङ्गे पुल निर्माण भएपछि हिमाली गाउँपालिका फैती, बाधु, धिम र मुगु खत्याड गाउँपालिकाका सुकाढिकका स्थानीयको लट्ठा प्रयोग गरेर वारपार गर्ने समस्या हटेको थियो। ज्यानको जोखिम पारेर बाबियाको लट्ठा प्रयोग गरी नदी तर्न बाध्य बनेका खत्याडका स्थानीयलाई झोलुङ्गे सहज बनाए पनि सडक सञ्जालको पहुँचबाट भने लामो समयदेखि वञ्चित हुँदै आउनु परेको थियो।

मुगुको खत्याड गाउँपालिकाका अधिकांश स्थानीयको मुख्य बजार नै हिमाली गाउँपालिकाको धुलाचौर हो। दैनिक उपभोग्य सामग्री तथा स्वास्थ्य सेवासुविधाका लागि त्यहाँका बासिन्दा बाजुराको हिमाली तथा बूढीनन्दा नगरपालिकाको कोल्टी बजार आउने गर्दछन्।

खत्याडका स्थानीयलाई सदरमुकाम गमगडी जाँदा अझै पाँच दिन पैदल हिँड्नुपर्छ। पुलले सडक सञ्जाल जोडिएपछि भने अब दुई घण्टामै सदरमुकाम गमगडी पुग्न सकिने बताइन्छ। बाजुरा र मुगु  सडक सञ्जालले जोडिएसँगै सुदूरपश्चिमका बझाङ, अछाम, डोटी, बैतडी, दार्चुला र डडेल्धुरा लगायतका जिल्लाबाट रारा जाने पर्यटकलाई समेत सहज हुने बताइन्छ।