नेपाल प्रिमियर लिग एनपिएल को फ्रेन्चाइज टोली सुदूरपश्चिम रोयल्सका विकेटकिपर ब्याट्सम्यान विनोद भण्डारीले आउँदै गरेको एनपिएल प्रतियोगिता चाडपर्व जस्तो लागिरहेको बताएका छन् ।

आसन्न एनपिएलका लागि  विनोदले सुदूरपश्चिम रोयल्सको क्रिकेट माहोललाई लिएर यस्तो प्रतिक्रिया दिएका हुन् । ‘मलाई त साँच्चै भन्दा एनपिएल एउटा चाडपर्व जस्तो लागिरहेको छ । विगतका दिनमा पनि धेरै वटा फ्रेन्चाइज प्रतियोगिताहरु खेलियो । तर, यसपालि क्यान आफैंले आयोजना गरिरहेको र सातवटै प्रदेश समावेश भइरहँदा चाडपर्वको माहोल बनेको छ,’ विनोदले बताए, ‘सुदूरपश्चिमको आफ्नै भाषा छ, आफ्नै क्रिकेट छ । खेलाडीहरु सुदूरकै भाषामा बोलिरहेका हुन्छन् । सबैजना इन्जोय गरिरहेका छन् ।’

अलराउन्डर दीपेन्द्र सिंह ऐरि मार्की खेलाडी रहेको सुदूरपश्चिमले टोलीमा आफ्ना प्रदेशका खेलाडीलाई प्राथमिकतामा राखेको छ । त्यस्तै मुख्य प्रशिक्षक जगत टमाटा पनि सुदूरपश्चिमकै हुन् । टोलीले ओलम्पियन दीपक विष्टलाई ब्रान्ड अम्बासडर बनाएको छ । विष्ट आफैं पनि सुदूरपश्चिमका हुन् ।

त्यस्तै विनोदले कागजमा सुदूरपश्चिम सन्तुलित टोली रहेको र सबै पक्षमा बलियो भएकाले मैदानमा राम्रो प्रदर्शनको आशा रहेको पनि बताए । ‘टोलीमा चार विदेशी अलराउन्डर आउँदैछन् । टोली सन्तुलित छ । त्यसैले मैदानमा राम्रो प्रदर्शन गर्नेमा विश्वस्त छु,’ विनोदले भने, ‘बलिङ र ब्याटिङ दुवै राम्रो छ । यही हाम्रो बलियो पक्ष हो । टोलीमा खासै सुधार गर्नुपर्ने पक्षहरु छैनन् ।’

सुदूरपश्चिमले एनपिएलका लागि स्कट्ल्यान्डका ब्रेन्डन म्याकमुलेन, इङ्ल्यान्डका सेइफ जयब, न्युजिल्यान्डका स्कट कुगुलेजीन र युएईका रोहन मुस्ताफालाई अनुबन्ध गरेको छ ।ब्याट्सम्यान आरिफ सेख र बलर अभिनास बोहोरा सुदूरपश्चिमका हेर्नलायक घरेलु खेलाडी हुन् । सुदूरपश्चिमको आइकनिक खेलाडीमा बसन्त खत्री छन् ।

सुदूरपश्चिमले मंसिर १८ गते विराटनगर किङ्ससँग प्रतिस्पर्धा गर्दै प्रतियोगिताको सुरुआत गर्नेछ ।