प्रिमियर लिगमा एउटै सिजन सबैभन्दा धेरै अंक बटुल्ने कीर्तिमान बनाउने लिभरपुलको सपना आर्सनलले चकनाचुर बनाएको छ । दुई सिजनअघि म्यान्चेस्टर सिटीले बनाएको १ सय अंकको कीर्तिमान भंग गर्नका लागि लिभरपुलले लिगका बाँकी खेलहरु जित्नुपर्ने थियो । तर, आर्सनलसँग २–१ को हार बेहोरेपछि लिभरपुलको सपना अन्त्य भएको हो ।
खेलमा अग्रता भने लिभरपुलले लिएको थियो । एन्ड्रु रोबर्टसनको पासमा साडियो मानेले खेलको २० औँ मिनेटमा लिभरपुललाई अग्रता दिलाएका थिए । तर, भर्जिल भान डाइक र गोलकिपर एलिसनको गल्तीमा अलेक्सान्डर लाकाजेट र रेइस नेल्सनले एक–एक गोल गर्दै आर्सनललाई अग्रता दिलाए ।
दोस्रो हाफमा लिभरपुलले आक्रामक खेल प्रस्तुत गरेपनि थप गोल हुन सकेन । आर्सनलले लिभरपुललाई पराजित गरेको सन् २०१५ को अप्रिलपछि पहिलो पटक हो । योर्गन क्लप भने पहिलो पटक आर्सनलसँग पराजित भएका हुन् ।
उता, म्यान्चेस्टर सिटीले रेलिगेसनबाट बच्न संघर्षरत बोर्नेमाउथलाई २–१ गोलअन्तरले हराएको छ । सिटीको जीतमा डेभिड सिल्भा र गब्रियल जिसुसले एक–एक गोल गरे । बोर्नेमाउथका लागि डेभिड ब्रुक्सले सान्तवना गोल गरे । म्यानेजरका रुपमा पेप ग्वार्डिओलाको प्रिमियर लिगमा यो १५० औँ खेल थियो । यसमध्ये उनले १११ खेल जितेका छन् ।
यता, ह्यारी केनको दुई गोलको मद्दतले टोटनह्यामले न्युक्यासलाई ३–१ गोलअन्तरले पराजित गरेको छ । सन ह्युङ मिनले खेलमा स्पर्सलाई अग्रता दिलाए पनि दोस्रो हाफमा म्याट रिचीले बराबरी गोल फर्काए । त्यसपछि केनले दुई गोल गर्दै टोलीको जीत सुनिश्चित गरे ।
दुई गोलसँगै २६ वर्षीय स्ट्राइकरले ३५० खेलमा २०१ गोल गर्न सफल भएका छन् । जीतपछि स्पर्स लिगको सातौँ स्थानमा उक्लिएको छ र युरोपा लिग खेल्ने सम्भावनालाई कायम राखेको छ ।
अन्य खेलमा बर्नली र वुल्झसले १–१ को बराबरी खेले ।
सम्बन्धित वर्गका समाचारहरू
