कैलालीमा कोरोना संक्रमित बालिकाको सम्पर्कमा आएका ९६ जनाको परिक्षण गरिएको छ । ती सवै परिक्षणको रिपोर्ट नेगेटिभ आएको छ ।

बर्दियाकी कोरोना संक्रमित ११ बषीय बालिकाको सम्पर्कमा आएका गोदावरी नगरपालिका वडा नम्वर ८ मजगाउँका ९६ जनाको कोरोना रिर्पोट नेगेटिभ आएको हो । मजगाउँबाटै थप ३८ जनाको समेत थ्रोट स्वाबको नमुना संकलन गरिएकोमा परीक्षण बाँकी रहेको गोदावरी नगरपालिकाले जनाएको छ ।

मजगाउँबाट दुई दिनमा एक सय ३४ जनाको नमुना संकलन गरिएको थियो । बर्दियाको राजापुर नगरपालिका–५ घर भएकी बालिकामा सोमवार कोरोना पुष्टि भएपछि उनको सम्पर्कमा आएकाहरुको थ्रोट स्वाब संकलन गरिएको थियो । ती बालिका कैलालीको गोदावरी नगरपालिकामा एक महिना बढी समय र भजनी नगरपालिकामा एक साता बसेर बर्दिया गएकी थिईन् ।