नेपाल तथा भारतका सुरक्षा अधिकारीबीच सीमाङ्कनको काम नसकिदासम्म विवादित क्षेत्रमा कुनै गतिविधि नगर्ने सहमति भएपनि स्थानीयले भने त्यसको विरोध गरेका छन् । ब्रह्मदेव स्थित विवादित क्षेत्रको निरीक्षण गर्दै दुबै देशमा सुरक्षा अधिकारीले सीमाङ्कन नहुँदासम्म कुनै किसिमको क्रियाकलप नगर्ने सहमति जनाए पनि स्थानीयले भने त्यसको विरोध गरेका हुन् ।
कञ्चनपुरको भीमदत्त नगरपालिका–९ ब्रह्मदेवमा वृक्षरोपण र सामुदायिक वनको जमिन घेरबारमा भारतीय पक्षले अवरोध सिर्जना गरेको छ । सिद्धनाथ सामुदायिक वनले गरिरहेको वृक्षरोपण र घेरबार गर्ने कार्यमा भारतीय पक्षले अवरोध सिर्जना गरेको हो । दादागिरी शैलीमा आएका भारतको सशस्त्र सीमा बल (एसएसबी) का जवानहरुले ब्रह्मदेव बजार नजिकै वृक्षरोपण र घेरबार गर्ने कार्यमा अवरोध गरेका सिद्धनाथ सामुदायिक वनका अध्यक्ष हर्कबहादुर चन्दले बताए । ‘आफ्नै भूमिमा तारबार र वृक्षरोपण गरिरहेका थियौँ, भारतीय पक्षले भारतीय भूमि भन्दै काम गर्न दिएको छैन’ उनले भने । एसएसबीले तारबार र वृक्षरोपण नगर्न चेतावनी दिए पनि स्थानीबासीको सहयोगमा आफूहरुले काम भने जारी राखेको उनले बताए ।
वनको ब्लक नम्बर–४ मा तारवारका लागि पोल गाड्ने क्रममा एसएसबीले हस्तक्षेप गरेपछि आक्रोसित बनेका स्थानीयले आफंैले तारवार गरेका थिए । उनीहरुले २०५५ सालमा पनि नेपाली पक्षले सो क्षेत्रमा तारबार गरेको भन्दै अहिले आएर रोक्न खोज्नु भारतीय पक्षको दादागिरी भएको बताएका छन् । उनीहरुले नेपाली भूमीमा भारतीय पक्षले हस्तक्षेप गरेको भन्दै वृक्षारोपण गर्ने समेत तयारी गरेका छन् । नेपाल भारत सीमास्तम्भ ९११ हराएको वर्षौ भएको छ ।
ब्रह्मदेव बजार नजिक पर्ने सो क्षेत्रमा वर्षेनी भारतीय पक्षले किचलो गर्दै आएको छ । नक्साङ्कनको काम नहुँदासम्म सो क्षेत्रलाई यथास्थितिमा राख्ने सहमति भएको सशस्त्र प्रहरीले जनाएको छ । भारतीय पक्षले सामुदायिक वनको घेरबार र वृक्षरोपणको काममा अवरोध सिर्जना गरेपछि स्थानीय प्रशासनले स्थलगत अनुगमन गर्दै भारतीय समकक्षीसँग छलफल समेत गरेको छ । सीमास्तम्भ नहुँदा ब्रह्मदेव क्षेत्रमा वर्षौदेखि सीमा विवाद रहेको सशस्त्र प्रहरी बल नेपाल नम्बर ३५ गणका एसपी बिरसिंह साहुले बताए । ‘पिल्लर नहुँदा त्यहाँ विवाद छ । स्थानीयहरुले आफ्नो भूमि यतासम्म हो भन्छन् । भारतीय पक्षले यता (ब्रह्मदेव बजारतर्फ) आफ्नो भूमि भन्छन्, उनले भने ।
भारतीय पक्षले केही दिन अघि पनि जिल्लाको दक्षिणी क्षेत्र बेलौरी नगरपालिका–८ पचुईमा पूर्व–पश्चिम हुलाकी राजमार्ग निर्माण कार्यमा अवरोध गरेको थियो । तर, स्थानीयले एसएसबीको सो कार्यको प्रतिवाद गरी सडक कालोपत्रे गरेका छन् ।
सम्बन्धित वर्गका समाचारहरू
