लिम्पियाधुरा पूर्वको कालापानी क्षेत्रस्थित नेपाली भूमिमा नेपालीलाई नै प्रवेश रोक्न आग्रह गर्दै पत्र लेख्ने भारतीय अधिकारीहरुले अहिले कुरा फेरेका छन् ।
भारतको उत्तराखण्डस्थित धार्चुलाका सब–डिभिजनल मजिस्ट्रेट (एसडीएम) ले आफूले नेपाललाई कुनै पत्र नलेखेको भारतीय सञ्चारमाध्यमलाई बताएपछि चर्चा चुलिएको छ ।
तर दार्चुलाका प्रमुख जिल्ला अधिकारी शरदकुमार पोखरेलले भने भारतीयहरुले कालापानी क्षेत्रमा नेपालीको प्रवेशमा रोक लगाउनु भनी यसअघि पत्र पठाए पनि अहिले नेपालको जवाफपछि अप्ठेरोमा परेर कुरा फेर्न थालेको सञ्चारमाध्यमलाई जानकारी दिनुभयो ।
भारतीय पक्षले चिठी लेखेकै कारण दार्चुला जिल्लाले जवाफ पठाएको जानकारी दिँदै उहाँले नेपालले जवाफ पठाएपछि उनीहरु अफ्ठेरोमा परेको बताउनुभयो ।
भारतले अतिक्रमण गरिराखेको नेपाली भूमिमा नेपालीलाई नै प्रवेशमा रोक लगाउने गरी पत्राचार गरेपछि दार्चुलाका सहायक सीडीओले धार्चुलाको इलाका प्रशासनलाई नावी, कुटी र गुन्जी नेपालकै भएकाले नेपाली नागरिकलाई अवरोध नगर्न पत्र पठाउनुभएको थियो ।
त्यसअघि भारतको धार्चुलास्थित इलाका प्रशासन कार्यालयका अधिकारीले उक्त भुभागमा नेपालीहरु लुकिछिपी जाने गरेको भन्दै त्यस्ता गतिबिधिबारे सूचना दिन आग्रह गर्दै पत्राचार गरेको थियो ।
तर शुक्रबार एकाएक भारतीय सञ्चारमाध्यमले भारतको उत्तराखण्डस्थित धार्चुलाका सब–डिभिजनल मजिष्ट्रेटलाई उधृत गर्दै नेपाललाई त्यस्तो पत्र नलेखेको जनाएपछि नेपाली अधिकारीले भारतले पत्र लेखेको प्रष्ट गरेका हुन् ।
नेपाललाईं पत्र पठाउने धार्चुलाका एसडीएम अनिलकुमार शुक्लाले नै आफूले पत्र लखेको भन्ने खबर झूठो भएको दाबी गर्नुभएको छ ।
भारत धार्चुलाका अधिकारीले १४ जुलाईमा नेपाली अधिकारीलाई लेखेको पत्रको जवाफ नेपाली अधिकारीले भने १४ दिनपछि २८ जुलाई अर्थात् साउन १३ गते पठाएका थिए ।
सम्बन्धित वर्गका समाचारहरू
