बार्सिलोनाबाट बाहिरिने योजनामा रहेका लियोनल मेसी क्लबको प्रि–सिजन  अभ्यासमा सहभागी नहुने भएका छन् । उनले प्रि–सजिनमा सहभागी नहुने मनसाय राख्दै प्रशिक्षक रोनाल्ड केएमनले आग्रह गरेको पिसिआर परीक्षण गराउन नचाहेको स्पेनिस खेल पत्रिका मार्काले जनाएको छ ।

रोनाल्डले सोमबारबाट प्रशिक्षण सुरु गर्नुअघि आइतबार सम्पूर्ण खेलाडीहरूको पिसिआर परीक्षण गर्ने योजना बनाएका छन् । यसलाई मेसी र बार्सिलोनाको द्वन्द्वको पछिल्लो घटनाक्रमका रूपमा लिइएको छ ।

यसअघि सञ्चारमाध्यमहरूले मेसीले बार्सिलोना नछाड्दासम्म प्रि–सिजन अभ्यासमा सहभागिता जनाउन सक्ने बताउँदै आएका थिए । तर, अब मेसीले प्रशिक्षणमा नजाने निर्णय गरेको र यसले मेसी र बार्सिलोना बीचको द्वन्द्वलाई बढाउनसक्ने अनुमान गरिएको छ ।