साउथह्याप्टनमा भएको आरोन फिन्च ११ विरुद्ध म्याक्सवेलले प्याट कमिन्स ११ बाट एक दिवसिय अभ्यास खेलमा शतक प्रहार गरेका हुन् । कमिन्स ११ ले फिन्च ११ लाई २ विकेटले हराएको छ । जितका लागि २ सय ५० रनको विजयी लक्ष्य पछ्याएको कमिन्स ११ ले ४१.३ ओभरमा ८ विकेटको क्षतिमा पूरा गरेको थियो ।
कमिन्स ११ को जितमा ग्लेन म्याक्सवेलले १ सय १४ बलमा ११ चौका र २ छक्का सहित १ सय ८ रनको शतकीय इनिङ खेले । म्याक्सवेललाई ३८ औं ओभरको दोस्रो बलमा नाथन लायनले मिचेल स्टार्कबाट क्याच गराए ।
ओपनर मार्कस स्टोइनिसले ७१ बलमा १२ चौका र २ छक्का सहित ८७ रन जोडे । कमिन्स ११ का अन्य स्टिभ स्मिथ ८, एलेक्स केरी १५ र एस्टन अगर ११ रनमा आउट भए । फिन्च ११ का मिचेल स्टार्कले ९ ओभरमा ४६ रन खर्चेर २ विकेट लिए । नाथन लायनले ९.३ ओभरमा ४७ रन खर्चेर ३ विकेट लिए । राइले मेरिडिथले ७ ओभरमा २ मेडन सहित ३७ रन खर्चिदै २ विकेट लिए ।
त्यसअघि साउथह्याप्टनमा पहिला ब्याटिङ गरेको फिन्च ११ को टोली ४८.४ ओभरमा २ सय ४९ रनमा अल आउट भएको थियो । ओपनर डेभिड वार्नर ३४, मार्नस लाबुसेन २१, आरोन फिन्च ९, मिचेल मार्श १८, ड्यानियल स्याम्स २८ रनमा आउट भए । तल्लोक्रममा एन्ड्रु टाईले ५० बलमा ६ चौका र ३ छक्का सहित ५९ रनको योगदान दिए । मिचेल स्टार्कले ५४ बलमा ६ चौका सहित ४१ रन जोडेका थिए ।
टोलीमा ११ औं खेलाडी नपुग्दा स्याम्सले दुई पटक ब्याटिङ गरेका थिए । स्याम्स पछिल्लो पटक २० रनमा आउट भए । मार्कस स्टोइनिसले ७ ओभरमा ३१ रन खर्चेर ४ विकेट लिए । प्याट कमिन्स र एडम जम्पाले समान २ विकेट लिए । एस्र्टन अगर र जोश हेजलवुडले १–१ विकेट लिए । अष्ट्रेलिया समान तीन ओडिआई र टि२० आई सिरिजको लागि इंग्ल्यान्ड भ्रमणमा एक हप्ता अघि निस्केको थियो ।
अष्ट्रेलिया र इंग्ल्यान्डबीचको पहिलो टि२० खेल सेप्टेम्बर ४, दोस्रो ६ र तेस्रो तथा अन्तिम ८ मा हुने छ । सेप्टेम्बर ११, १३ र १६ मा क्रमश : पहिलो, दोस्रो र तेस्रो तथा अन्तिम ओडिआई खेल हुने छ । टि२० साउथह्याप्टनमा र ओडिआई म्यानचेस्टरमा हुने छ ।
सम्बन्धित वर्गका समाचारहरू
