धनगढीमा एक महिलाको हत्या गरिएकोे आरोप लागेको छ । धनगढी उपमहानगरपालिका जालीकी ४४ वर्षीया नरपता विष्ट खड्काको हत्या भएको आरोप लगाईएको हो । नरपता हिजो मात्रै मृत फेला परेकी थिईन ।
महिला मानव अधिकार रक्षक सञ्जालले आज विज्ञप्ती जारी गर्दै नरपताको हत्या भएको तर विष सेवनबाट मृत्यु भएको भन्दै आत्महत्या बनाउन खोजिएको आरोप लगाएको छ । ‘नरपताको पृष्ठभूमि, घटना भएको दिन उनका माइती पक्षसंग भएको कुराकानी र घटनापछि मृतकका सौतेना छोरा, श्रीमान् र आफ्नै छोराबाट भएको घटना अध्ययन गर्दा उनको आत्महत्या नभई हत्या भएको शंका गर्न सकिने थुप्रै ठाउँहरु छन ।’ जारी विज्ञप्तीमा भनिएको छ ।
घटना अध्ययन अनुसार मृतक नरपताका सौतेना छोरा एकेन्द्र खड्का र नरेश खड्काले विगतदेखि नै सम्पत्तिको विषयलाई लिएर उनीमाथि कुटपिट, गालीगलौज गर्ने, घर निकाला गर्ने गरेको आरोप समेत लगाईएको छ । यता जिल्ला प्रहरी कार्यालय कैलालीले भने नरपताको विष सेवनबाटै मृत्यु भएको जनाएको छ । जिल्ला प्रहरी कार्यालय कैलालीका प्रहरी नायव उपरिक्षक दक्षकुमार बस्नेतले घटनाको छानविन भईरहेको बताए ।
यस्तो छ विज्ञप्ती
धनगढी उपमहानगरपालिकाको जालीकी ४४ वर्षीया नरपता विष्ट खड्काको २०७७ जेठ ६ गते मंगलबार रहस्मय तरिकाले भएको मृत्युप्रति हामी कैलालीका मानव अधिकार रक्षकहरुको गम्भीर ध्यानाकर्षण भएको छ । बन्दाबन्दीको यो समयमा घरका सबै सदस्य घर बाहिर निस्कन नमिल्ने अवस्थामा विष सेवनबाट मृत्यु भयो भनिएकी नरपताको पृष्ठभूमि, घटना भएको दिन उनका माइती पक्षसंग भएको कुराकानी र घटनापछि मृतकका सौतेना छोरा, श्रीमान् र आफ्नै छोराबाट भएको घटना अध्ययन गर्दा उनको आत्महत्या नभई हत्या भएको शंका गर्न सकिने थुप्रै ठाउँहरु छन् ।
घटना अध्ययन अनुसार मृतक नरपताका सौतेना छोरा एकेन्द्र खड्का र नरेश खड्काले विगतदेखि नै सम्पत्तिको विषयलाई लिएर उनीमाथि कुटपिट, गालीगलौज गर्ने, घर निकाला गर्ने गरेको थाहा भएको छ करिब हप्ता दिन अघिबाट पनि घरमा उनलाई गाली बेईजती गर्दै कुटपिट भईरहेको भन्ने कुरा उनले आफ्नो माईती पक्षलाई टेलिफोनमा गरेको कुराकानीबाट थाहा भएको छ । हिजो ६ गते दिउँसो १ बजेतिर घटना भइसकेपछि नीजका श्रीमान् चक्र खड्का, सौतेना छोराहरु एकेन्द्र खड्का, नरेश खड्का लगायत परिवारले घटना बारे निजकी धनगढीमै रहेकी आफ्नै छोरी लगायत माइती पक्षलाई खबरै नगरि टाढाका माइती पक्षको घरमै गएर नरपताले विष खाएर मरी, तपाईले हस्ताक्षर गर्दिनुपर्यो, लास उठाउन गाहे भो भन्दै घर घरमा पुगेको र कसैले हस्ताक्षर गर्न नमानेपछि मात्रै मंगलबार लास उठ्न नसकेका कारण राती १० बजेपछि बाहिरकै मान्छेबाट छोरी र माइती पक्षले घटना बारे थाहा पाएको बुझिएको छ । यदि यो आत्महत्या नै हो भने घटना भइसकेपछि उनकी छोरी र माइती पक्षलाई समयमै सबै कुरा किन भनिएन ?
आफ्नै छोरी, आमाबुबा र भाईले घटना बारे घण्टौंपछि अरुबाट थाहा पाउनु पर्ने किन ? मृतकका छोराहरु किन टाढाटाढाका मान्छेलाई हस्ताक्षर गराउन हिँडे ? अनि लकडाउनको यस्तो अवस्थामा घरभरि मान्छे हुँदासमेत एउटा महिलाले विष सेवन गरेर मर्नु पर्ने अवस्था किन आयो ? विष सेवन गरेको मान्छेलाई समयमै अस्पताल किन पुर्याइएन ? यी सबै कुराहरु बुझ्दा यो आत्महत्या नभई हत्या नै हो कि भन्ने हाम्रो बुझाई छ ।
यसर्थ जिल्ला सदरमुकाम तथा प्रदेश राजधानीमै दिन दहाडै भएको यो घटनाबारे सत्य तथ्य बाहिर ल्याउनका लागि न्यायको पक्षमा सधै वकालत गर्ने संचार माध्यमहरुले पनि साथ दिनु हुनेछ भन्ने हाम्रो पूर्ण विश्वास रहेको छ । प्रहरीले यस बारेमा अनुसन्धान गर्न ढिलासुस्ती, आनाकानी र झण्झट नमानी सत्य तथ्य पत्ता लगाओस् भन्ने हाम्रो जोडदार माग रहेको छ । अन्यथा हामी अधिकारकर्मीहरु मृतकको न्यायको लागि शारीरिक दुरी कायम गर्दै कडा आन्दोलनमा उत्रिन बाध्य हुनेछौं भन्ने कुरा पनि यही विज्ञप्ती मार्फत अवगत गराउन चाहान्छौं ।
सम्बन्धित वर्गका समाचारहरू
