पूर्वपश्चिम राजमार्ग अन्तर्गत कञ्चनपुरको झलारी बजारमा मोटरसाइकल दुर्घटनामा परेका राष्ट्रिय क्रिकेटर ललित भण्डारीको अवस्था खतरा बाहिर रहेको चिकित्सकले बताएका छन् । धनगढीबाट थप उपचारका लागि नेपालगंज मेडिकल कलेज लगिएकोमा उनको स्वास्थ्य अवस्थामा धेरै सुधार भएको र अवस्था खतरा बाहिर रहेको उपचारमा संग्लन चिकित्सको भनाई छ ।
उनको खुट्टा, कम्मर र टाउकोमा चोट लागेको छ । त्यो बाहेक शरिरमा भित्रि चोट नरहेको चेकजाँचमा देखिएको छ । धनगढीको निसर्ग अस्पतालमा उपचार गरिएपछि टाउकोको चोटको सिटी स्क्यान यहाँ सम्भव नभएपछि नेपालगञ्ज रेफर गरिएको थियो । त्यहाँ आज विहान सिटी स्क्यान गर्दा भित्रि चोट नरहेको रिर्पोट आएको ललितसँगै नेपालगंज मेडिकल कलेजमा रहेका उनका साथी सन्दिप कुँवरले खबरकुञ्जलाई जानकारी दिए ।
धनगढीबाट महेन्द्रनगरतर्फ जाँदै गरेको से १ ख १३२४ नंम्बरको ट्रक र म २ प ४७०५ नम्बरको एक आपसमा ठोक्किदा मोटरसाइकलमा सवार क्रिकेटर भण्डारी घाइते भएका थिए । कोरोना महामारीका कारण भण्डारी अहिले घरमै थिए । दुर्घटनामा शुक्लाफाँटा नगरपालिका १० का भण्डारी र उनका भाइ नाता पर्ने करन ठगुन्ना पनि घाइते भएका थिए ।
भण्डारी सवार मोटरसाइकललाई ठक्कर दिने ट्रकका चालक भने फरार रहेका छन् । ललित पछिल्लो समय चोटका कारण राष्ट्रिय टोलीबाट बाहिर रहेका छन् । नेपाल पुलिस क्लबबाट घरेलु क्रिकेट खेल्दै आएका उनी फ्रेन्चाइज लिगमा नियमित खेलिरहेका खेलाडी हुन् ।
भण्डारीले सन् २०१७ देखि राष्ट्रिय क्रिकेट टोलीमा सहभागी भई क्रिकेट खेल्दै आएका छन् । २०१७ डिसेम्बरको विश्व क्रिकेट लिग च्याम्पियनसिपमा युएईसंग खेल्दै डेब्यु गरेका भण्डारी त्यसपछि नियमित रुपमा टिममा रहेका छन् । नेपालले नेदरल्याण्डसंग अगस्टमा खेलेको एकदिवसीय सिरिज अन्तर्गत टिममा रहेका भण्डारीले नेपाल १ रनले विजयी हुँदै पहिलो एकदिवसीय अन्तर्राष्ट्रिय जित हासिल गर्ने क्रममा २ विकेट लिएका थिए ।
नेपाल पुलिस क्लबको लागि नियमित घरेलु क्रिकेट खेल्ने भण्डारीले सन् २०१३ को यु–१९ युथ एसिया कपमा नेपाली अन्डर–१९ टिमको लागि पहिलो पटक खेल्ने मौका पाएका थिए । डेब्युमा पाकिस्तानसंग २ विकेट लिएका उनले त्यस प्रतियोगितामा कुल ३ खेलमा ५ विकेट लिंदै प्रभावित बनाएका थिए ।
सम्बन्धित वर्गका समाचारहरू
