इङ्गल्याण्ड तथा अष्ट्रेलियाबीच जारी ३ खेलको एक दिवसीय सिरिजको तेस्रो तथा अन्तिम खेल बुधबार म्यानचेस्टस्थित इमिरेट्स वल्र्ड ट्राफोर्ड मैदानमा नेपाली समय अनुसार साँझ पौने ६ मा हुनेछ ।
सिरिज १–१ को बराबरीमा रहेकाले दुबै टोली आजको खेलमा जित निकाल्दै सिरिज कब्जा गर्ने दाउमा हुनेछन् ।
आजको खेलमा जित निकाल्दै पाहुना टोली अष्ट्रेलिया ५ वर्षपछि इङ्गल्याण्डमा एक दिवसीय सिरिज जित्न चाहन्छ । सन् २०१५ मा भएको ५ खेलको सिरिजमा ३–२ को जित हात पारे यता अष्ट्रेलियाले इङ्गल्याण्डमा एक दिवसीय सिरिज जित्न सकेको छैन ।
त्यसयता इङ्गल्याण्डमा भएका २ एकदिबसीय सिरिजमा दुबैमा अष्ट्रेलिया पराजित भएको छ ।
इङ्गल्याण्ड पनि ५ वर्ष यताको अपराजीत यात्रालाई जारी राख्न चाहान्छ । पछिल्लो खेलमा जित हात पारेको इङ्गल्याण्ड आजको खेलमा उच्च मनोवलको साथमा मैदानमा उत्रिनेछ ।
घरेलु टोली इङ्गल्याण्ड इयन मोर्गानको कप्तानीमा तथा पाहुना टोली अष्ट्रेलिया आरोन फिंचको कप्तानीमा मैदानमा उत्रिनेछन् ।
पहिलो खेलमा अष्ट्रेलिया १९ रनले विजयी हुदा दोस्रो खेलमा इङ्गल्याण्ड २४ रनले विजयी भएको थियो ।
सम्बन्धित वर्गका समाचारहरू
