नेपाली कांग्रेसका नेता नैनसिंह महरले सत्तारुढ नेपाल कम्युनिस्ट पार्टी (नेकपा) का कार्यकारी अध्यक्ष पुष्पकमल दाहाल प्रचण्डले पेस गरेको राजनीतिक प्रस्तावको प्रधानमन्त्री केपी शर्मा ओलीले जनताको अदालतमा उभिएर स्पष्ट जवाफ दिनुपर्ने बताएका छन्। कांग्रेस महासमिति सदस्य एवं नेविसंघका पूर्व अध्यक्ष समेत रहेका नेता महरले पोखरा विमानस्थलमा सञ्चारकर्मीहरूसँग बोल्दै ‘ओली प्रवृत्ति’ राष्ट्र र स्वयं नेकपाकै लागि घातक भएको बताए।
‘नेकपाले बालुवाटार र सिलत निवासलाई पार्टी कार्यालय जस्तै बनाएको छ। राष्ट्रपति पनि नेकपाको कार्यकर्ता जस्तो देखिनु भएको छ। जसले पदिय मर्यादामाथि नै प्रश्न उठाइदिएको छ’, नेता महरले भने, ‘उहाँलाई म पदिय मर्यादा कायम राख्न आग्रह गर्छु।’ उनले नेकपालाई चीन र भारतले चलाइरहेको योजना र लक्ष्य विहिन पार्टीको संज्ञा दिए। चिनिया राजदूतको सक्रियता र भारतीय गुप्तचर संस्था रिसर्च एन्ड एनालाइसिस विङ (रअ) प्रमुखसँगको क्रियाकलापले पनि सरकारको तालाचावी बाहिरै रहेको प्रस्ट भएको नेता महरको आरोप छ।
उनले सरकारलाई देश र जनतामाथि गद्दारी नगर्न आग्रह गरेका छन्। ‘कम्युनिस्ट सरकार कोरोना महामारी नियन्त्रणमा चुकिसकेको छ। मल नपाएर छटपटाइरहेका किसानका खेतमा देखिन छोडिसकेको छ’, उनले भने, ‘सरकार अहिले चिनिया दुतावा, सितल निवास तिर मात्रै झुल्किने गरेको छ। जसले देश र जनतालाई घातक मोडमा लैजाने छ।’
उनले प्रधानमन्त्री ओलीलाई बेलैमा सच्चिन चेतावनी दिएका छन्। पार्टीभित्रैबाट चर्को विरोध हुँदा पनि कुर्सीमा टासिरहनु ओलीकै लागि लज्जाको विषय भएको उनको तर्क छ।
सम्बन्धित वर्गका समाचारहरू
