नेपाली काँग्रेसका नेता तथा पूर्व स्वास्थ्यमन्त्री गगन थापाले सरकारलाई सडक, संसदमा दबाब दिनु प्रतिपक्षको धर्म भएको बताएका छन् । ‘योभन्दा पहिला प्रतिपक्षको भूमिकामा जनताको चित्त दुखाइ थियो’, धनगढीमा प्रेस युनियन कैलालीले आयोजना गरेको पत्रकार सम्मेलनमा उनले भने, ‘प्रतिपक्षले सशक्त रूपमा सरकारलाई दबाब दिन कांग्रेसले प्रारम्भ गरेको छ । हिजोको प्रदर्शनले पनि यो सन्देश दिएको छ ।’ अहिलेको आवश्यकता  नै संसद र सडकको शक्तिलाई एकाकार गरी सरकारलाई खबरदारी गर्ने समय आएको उनको भनाइ छ ।

उनले नेकपामा भएको झगडा आन्तरिक कुरा भएको उल्लेख गरे । ‘नेपाल कम्युनिस्टमा भएको झगडा उहाँको आन्तरिक विषय होला । यो बेला पार्टीको ध्यान महामारीका समस्याहरू हल गर्नेतर्फ खिचिनुपर्छ भन्ने मान्यता मेरो छ’, उनले भने, ‘अहिले काठमाडौँको माइतीघर मण्डलमा किसानहरू आन्दोलनमा हुनुहुन्छ । तर, सरकारका उद्योगमन्त्री उहाँहरू किसान होइनन्, दलाल हुन् भन्नुहुन्छ । यो बेला प्रतिपक्षले सरकारलाई जनताका दुःखप्रति जिम्मेवार बन्न घच्घच्याउने समय हो ।’

कांग्रेसले दिएका सुझावलाई सरकारले बेवास्ता गरेकै कारण सडक आउन बाध्य भएको उनको तर्क छ । ‘नेपालको प्रधानमन्त्री बिहानदेखि बेलुकासम्म व्यस्त हुनुहुन्छ तर, जनजीविका सवालहरू उहाँको प्राथमिकतामा छैन’, उनले भने ।  नेता थापाले पार्टीको महाधिवेशन अहिलेकै कार्यतालिकामा हुन नसक्ने बताए । अब बस्ने बैठकले नयाँ कार्यतालिका तय गर्ने उनले उल्लेख गरे । ‘सम्भवतः वैशाखमा महाधिवेशन तोकिन्छ होला’, उनले भने ।