कैलाली जिल्ला क्रिकेट संघको आयोजना तथा सुदुरपश्चिम प्रादेशिक क्रिकेट विकास समितिको आतिथ्यतामा भईरहेको प्रधानमन्त्री कप सुदूरपश्चिम छनोट प्रतियोगिताको उपाधिका लागि कैलाली र बैतडी प्रतिस्पर्धा गरिरहेका छन् ।
पुस ४ गतेदेखि धनगढीको फाप्ला मैदानमा भईरहेको प्रतियोगिताको मंगलबार भएका सेमिफाईनलमा जित हात पार्दै कैलाली र बैतडी बुधबार उपाधिका लागि भिडिरहेका हुन् । मंगलबार भएको पहिलो सेमिफाईनलमा कैलालीले कञ्चनपुरलाई ७ विकेटले हराएको थियो भने बैतडीले बझाङलाई ४२ रनले किनारा लगाएको थियो ।
यसअघि लिग चरणमा भएको खेलमा बैतडीले कैलालीलाई हराएको थियो । दुबै टोली लिग चरणमा एक समुहमा रहेका थिए । बैतडी विजेता र कैलाली उपविजेता बनेको थियो । धनगढीको फाप्ला मैदानमा बैतडीले टस जितेर पहिले ब्याटिङ गरिरहेको छ । कैलालीले यसअघि पहिले ब्याटिङ गर्दै ७५ रन मात्रै बनाउँदा पनि बैतडीलाई जित्न हम्मेहम्मे भएको थियो ।
कैलालीका अधिकांश युवा महिला खेलाडीहरु फाप्लामा अभ्यास समेत गर्दै आईरहेका छन भने बैतडीमा अधिकांश अनुभवी खेलाडीहरु रहेका छन् । प्रधानमन्त्री कप प्रदेश स्तरीय छनोट महिला टी–२० क्रिकेट प्रतियोगिताको फाईनल खेलसँगै प्रदेश छनोट आज सकिदैछ । प्रतियोगिताबाट उत्कृष्ट खेलाडी छनोट गर्दै सुदुरपश्चिम प्रदेशको टीम बनाईनेछ ।
सम्बन्धित वर्गका समाचारहरू
