सुदूरपश्चिम प्रदेश सरकारले कोरोना विरुद्धको खोप लगाउनका लागि १० वटा खोप केन्द्र तोकिएको छ। प्रदेश सामाजिक विकास मन्त्रालयले कैलालीको सेती प्रादेशिक अस्पताल र टीकापुरलाई खोप केन्द्र रुपमा तोकेको छ।

प्रदेशका बाँकी अन्य ८ वटा जिल्लामा जिल्ला अस्पताललाई खोप केन्द्र तोकिएको छ।  संघीय सरकारले सुदूरपश्चिमका १६ हजार २ सय ९३ जनालाई पुग्‍नेगरी कोरोना भाइरस विरुद्धको खोप पठाएको छ । स्वास्थ्य सेवा विभागले रेफ्रिजेटर भ्यान मार्फत आइतबार कोरोना विरुद्धको खोप पठाएको सामाजिक विकास मन्त्रालयका प्रवक्ता नरेन्द्र कार्कीले जानकारी दिए।

उनले भने-‘मंगलबारसम्म खोप सुदूरपश्चिम पुग्ने भएको छ, त्यसका लागि आन्तरिक व्यवस्थापनको काम समेत थालिएको छ।’  प्रदेश सरकारले प्रदेशका सरकारी, गैरसरकारी तथा निजी स्वास्थ्य संस्थामा कार्यरत स्वास्थ्यकर्मी र महिला स्वास्थ्य स्वयम सेविकालाई प्राथमिकतामा राखेर खोप, अभियानकै रुपमा सञ्चालन गर्ने तयारी गरेको छ।

मन्त्रालयका प्रवक्ता कार्कीका अनुसार पहिलो चरणमा खोप लगाउन १६ हजार २ सय ९३ जना स्वास्थ्यकर्मीको तथ्यांक संकलन गरिएको छ।

उनीहरुलाई माघ १४ गतेदेखि १८ गतेसम्म पहिलो चरणको खोप लगाइने कार्कीले बताए । प्रदेशको स्वास्थ्य आपुर्ति व्यवस्थापन केन्द्रले खोप भण्डारणको सबै तयारी सकिएको जनाएको छ।