बैतडीको देहिमाडौंमा सम्पन्न प्रथम उज्यालो टि–१० लिग (युसिएल) क्रिकेटको उपाधि निंग्लाशैनी वारियर्स ‘ए’ ले हात पारेको छ। निंग्लाशैनीले कैलपाल क्रिकेट क्लबलाई ९ विकेटले स्तब्ध पार्दै उपाधि हात पारेको हो।
कैलपालले दिएको ८८ रनको लक्ष्य निंग्लाशैनीले ७ दशमलव ५ ओभरमा १ विकेटको क्षतीका पुरा गर्यो। निंग्लाशैनीको जितका लागि राम चन्दले अर्धसतकिय पारीका साथ ५० रन बनाए। कैलपालका लागि सुनिल कार्कीले १ विकेट झारे।
त्यसअघि निंग्लाशैनी खेल मैदानमा टस जितेर पहिला ब्याटिंग गरेको कैलपाल क्रिकेट क्लबले निर्धारित १० ओभरमा ७ विकेटको क्षतीमा ८७ रन बनायो। जसमा जीवन चन्दले सर्वाधिक २२ रनको योगदान गरे। निंग्लाशैनी वारियर्सका धिरज मल्लले ३ विकेट हात पारे। उपाधिसंगै निंग्लाशैनीले नगद २५ हजार हात पारेको छ भने उपविजेता कैलपालले १२ हजारमा चित्त बुझायो।
फाइनल खेलका म्यान अफ द म्याच निंग्लाशैनीका राम चन्द भए। प्रतियोगिताभर व्यक्तिगत १३० रन र ६ विकेट हात पारेका राम चन्द नै म्यान अफ द सिरिज भए। प्रतियोगितामा १० विकेट हात पारेका कैलपालका विरेन्द्र चन्द बेस्ट बलर, १४५ रन हिर्काएका निंग्लाशैनीका डम्बर बुडाल बेस्ट ब्याट्सम्यान र उदयीमान खेलाडी निंग्लाशैनी वारियर्स बी का अंकित धामी भएका छन्।
विजेता तथा उपविजेता टोलीलाई जिल्ला समन्वय समितिका सदस्य रमेश बोहरा, दशरथचन्द नगरपालिका वडा नम्बर २ का अध्यक्ष रनबहादुर बोहरा, बैतडी जिल्ला क्रिकेट संघका उपाध्यक्ष लोकराज जोशी लगायतले पुरस्कार वितरण गरेका छन्। निंग्लाशैनी ग्वाल्लेक क्रिकेट एकेडेमी र दशरथचन्द नगरपालिका वडा नम्बर २ को संयुक्त आयोजनामा फागुन ४ गतेदेखि सुरु भएका प्रतियोगितामा १४ टोली सहभागी रहेका थिए।
बैतडीमा क्रिकेट विकासका साथै खेलाडी उत्पादन गर्ने उद्देश्यले प्रतियोगिताको सञ्चालन गरिएको निंग्लाशैनी ग्वाल्लेक क्रिकेट एकेडेमीका संयोजक दीपेन्द्रबहादुर बोहराले बताए।
सम्बन्धित वर्गका समाचारहरू
