महाकालीमा हाम फालेकी महिलाको भारतीय प्रहरीले उद्धार गरेको छ ।
महाकाली पुलबाट आइतबार ४:३० बजे हाम फालेकी नेपाली महिलाको भारतीय क्षेत्रतर्फको चौकीका जल कन्सटेबल प्रताप गढियाले ती महिलाको उद्धार गरेका हुन् ।
नदीको गहिराइ अधिक भए पनि ती प्रहरी कन्सटेबल गढीयाले आत्महत्याको प्रयास गरेकी महिलाको सकुशल उद्धार गरेको बताएका छन् ।
कञ्चनपुरको दोधारा चाँदनी वडा नम्बर-६ निवासी सरस्वती नाम बताउने ती महिलाले घरेलु समस्याका कारण आत्महत्याको प्रयास गरेको भारतीय प्रहरीले जानकारी दिएको छ ।
ती महिलालाई उद्धार गरिएको बारे नेपाल प्रहरीलाई पनि जानकारी गराएर उनका भाइ सागरको जिम्मा लगाइएको ईलाका प्रहरी कार्यालय गड्डाचाैकीका ईन्चार्ज जीवन गुरूङले जानकारी दिएका छन् ।
कञ्चनपुर प्रहरी प्रवक्ता डीएसपी अमरबहादुर थापाले ती महिलाको अवस्था सामान्य रहेको र उनलाई परिवारका सदस्यको जिम्मा लगाइएको पुष्टि गरेका छन् ।
सम्बन्धित वर्गका समाचारहरू
