कैलाली बहुमुखी क्याम्पसमा बिद्यार्थीहरुले लगाएको तालाबन्दी खुलेको छ। त्रिभुवन विश्वविद्यालय अन्तरगत परीक्षा दिएका सम्पूर्ण बिद्यार्थीहरुले आफूहरूका मागहरू पुरा नभएको भन्दै बुधवार सामूहिक रूपमा तालाबन्दी गरेका थिए । बिहीबार क्याम्पस प्रशासन र बिद्यार्थीहरु बिचको छलफलपछि मागहरू सम्बोधन गर्न प्रशासन तयार भएपछि ताला खोलीएको बीबिएस चौथो वर्षमा अध्ययनरत विद्यार्थी दिनेश डसालले बताए ।
क्याम्पसमा पठनपाठन सुरु हुनुपर्ने,अनलाइन कक्षा प्रभावकारी रूपमा सञ्चालन नभएकाले ४० प्रतिशत शुल्क मिनाहा गरिनुपर्ने,बिद्यार्थीहरुलाई कोरोना खोपको ग्यारेन्टी हुनुपर्ने, अनलाइन कक्षा लिन नपाएका बिद्यार्थीहरुको लागी अतिरिक्त कक्षाको व्यवस्था हुनुपर्ने लगायतका माग राख्दै बिद्यार्थीहरुले १९ भाद्रमा ज्ञापन पत्र बुझाए पनि ४ दिनसम्म पनि माग सुनुवाइ नभएपछि तालाबन्दी गरेका थिए ।
‘हाम्रा मागहरू प्रति क्याम्पस प्रशासन गम्भीर नबनेपछि हामीले तालाबन्दी गरेका थियौँ, बीबिएस चौथो वर्षमा अध्ययनरत अर्का विद्यार्थी दीपक ऐरले भने,- अहिले प्रशासनले चासो दिएको छ,सबै माग पुरा गर्ने भनिएको छ, यो सँगै अहिलेलाई हामीले आन्दोलन स्थगित गरेका छौँ।’
विद्यार्थी र क्याम्पस प्रशासनको छलफल पछि क्याम्पसका सबै संकायका कक्षाहरू असोज १ गतेदेखि सुरु गर्ने, १ ० असोजबाट भौतिक रुपमै कक्षा सञ्चालन गर्ने, शुल्क मिनाहा गर्न समेत पहल गर्ने बिद्यार्थीहरुलाई खोपको व्यवस्था गर्ने लगायतका विषयमा सहमति भएको छ ।
सम्बन्धित वर्गका समाचारहरू
