बलिउडका ‘हेण्डसम हंक’ ऋतिक रोशनको साइन्स फिक्सन फिल्म ‘कृष’ रिलिजको १५ वर्ष पुरा भएको छ । यो मौकामा ऋतिकले आफ्ना फ्यानमाझ नयाँ खुशीको खबर सार्वजनिक गरेका छन् ।
उनले एक भिडियो सामाजिक सञ्जालमा राख्दै फिल्मको चौथो संस्करण ‘कृष ४’ विधिवत घोषणा गरेका छन् । यो फिल्मलाई लिएर धेरै पहिल्यैदेखि चर्चा परिचर्चा भए पनि आधिकारिक रुपमा कसैले जानकारी दिएको थिइन् । तर ऋतिकले नै सामाजिक सञ्जालमा टिजर शैलीको भिडियो राखेर फिल्म निर्माण हुने जनाउ दिएका हुन् ।
भिडियोमा कृष र उसको नयाँ मास्कको झलक देखाइएको छ । भिडियोको अन्तिममा ‘कृषको १५ वर्ष’ लेखिएको छ । ‘अतितमा जे हुनु थियो, त्यो भइसकेको छ । हेर्दै जाउँ, भविष्य के लिएर आउछ’, उनले लेखेका छन् ।
फिल्म ‘कृष’ सन् २००६ को जून २३ मा रिलिज भएको थियो । यो ऋतिकको पहिलो साइन्स फिक्सन फिल्म ‘कोही मिल गया’को सिक्वेल थियो । फिल्मको निर्देशन राकेश रोशनले गरेका थिए । फिल्ममा ऋतिकका साथ प्रियंका चोपडा, रेखा, नसीरुद्दीन शाह प्रमुख भूमिकामा थिए ।
समाचार अनुसार यो चौथो फिल्ममा ऋतिकको चरित्र अर्थात कृष आफ्नो बुवा रोहित मेहरालाई फर्काउन यात्रामा निस्कने बताइएको छ । कृषको एलियन साथी जादूलाई फर्काउने सम्भावना पनि उत्तिकै छ ।
‘कृष ४’मा कैयौं सुपरभिलेन देखिनेछन् । जसले कृषसँग द्वन्द्व गर्नेछन् ।
सम्बन्धित वर्गका समाचारहरू
