कञ्चनपुरको बेलौरीमा लागु औषध सहित दुई जनालाई सशस्त्र प्रहरीले  पक्राउ गरेको छ । बुधबार साँझ सशस्त्र प्रहरी बल बिओपी बेलौरीबाट खटिएको सशस्त्र प्रहरी टोलीले बेलौरी नगरपालिका ८ स्थित सिमा स्तम्भ नम्बर ३८  नजिकबाट ०.६१ ग्राम खैरो हेरोइन जस्तो देखिने लागु औषध सहित दुई जनालाई पक्राउ गरेको हो ।

पक्राउ पर्नेमा बेलौरी नगरपालिका १० का २५ वर्षीय रामु खाँण ठकुरी र बेलडाँडी गाउँपालिका ३ का २३ वर्षीय आशिष उपाध्यायलाई लगुऔषध सहित पक्राउ गरेको सशस्त्र प्रहरी नायव उपरीक्षक गंगा पन्तले जानकारी दिए ।

पक्राउ परेका  दुवै जना म २ प ९६१८ नम्बरको मोटरसाइकलमा सवार रहेको र उनीहरूलाई थप अनुसन्धान तथा कारवाहीका लागि  ईलाका प्रहरी कार्यालय बेलौरीको जिम्मा लगाईएको छ । पक्राउ परेका दुवै जनालाई प्रहरी हिरासतमा राखी  थप अनुसन्धान भइरहेको इलाका प्रहरी कार्यालय बेलौरीका प्रहरी निरीक्षक रणबहादुर चन्दले बताए  ।