सुदूरपश्चिम प्रदेश सरकारको मन्त्रिपरिषद् पुनर्गठन भएको छ । प्रदेश सरकार पुनर्गठन भएसँगै मन्त्रिपरिषद्मा काँग्रेसले पनि सहभागिता जनाएको छ ।

आजराति देखि निर्वाचन आचारसंहिता लागु हुने भएपछि हतारहतारमा काँग्रेसलाई सरकारमा सहभागी गराएको हो ।

नयाँ गठन हुने मन्त्रिपरिषद्मा काँग्रेस संसदीय दलका नेता रणबहादुर रावल आन्तरिक मामिला तथा कानून मन्त्री, गोविन्द बोहरा सामाजिक विकास मन्त्री र टेकबहादुर रैका सामाजिक विकास राज्यमन्त्री बनेका छन् ।  

एकीकृत समाजवादीबाट मन्त्री रहेका आन्तरिक मामिलामन्त्री पूर्णा जोशी, सामाजिक विकासमन्त्री लालबहादुर खड्का, आर्थिक मामिलामन्त्री तारा लामालाई फिर्ता बोलाइएको हो। उनीहरूले राजीनामा दिएपछि नयाँलाई नियुक्त गरिएको हो। यस्तै भौतिक पूर्वाधार विकास राज्यमन्त्रीबाट चुनकुमारी चौधरी फिर्ता भएकी छिन् भने एकीकृत समाजवादीकै कुलवीर चौधरी नियुक्त भएका छन्।

अर्थ राज्यमन्त्रीबाट माया तामाङ बोहरा फिर्ता भएकी छिन् भने अमर साउद नियुक्त भएका छन्। सामाजिक विकास राज्यमन्त्री मनाकुमारी साउदलाई पनि समाजवादीले फिर्ता बोलाएको छ।नवनियुक्त मन्त्रीहरूले आजै शपथ ग्रहण गरेका छन् ।

यसअघि सम्म प्रतिपक्षमा रहेको काँग्रेसले स्थानीय तहको निर्वाचन नजिकिँदै गइरहेको बेला सत्तारुढ गठबन्धनले केन्द्रबाटै चुनावी तालमेल गर्ने निर्णय गरे पनि सुदूरपश्चिम प्रदेशमा काँग्रेसले आफूलाई सरकारमा सामेल नगराएकाले स्थानीय निकायको चुनावमा गठबन्धन हुन नसक्ने बताउँदै आएको थियो।