सत्तारुढ गठबन्धनबाट धनगढी उपमहानगरपालिकाको लागि उम्मेदवारी दिन पुगेका निवर्तमान मेयर नृप बहादुर वडले आफूहरूको कसैसँग प्रतिष्पर्धा नभएको दाबी गरेका छन् । धनगढी नेपाली कांग्रेसको पकड भएको क्षेत्रको बताउँदै उनले गठबन्धन बनेपछि झनै बलियो भएकोले आफूहरूको कुनै दल वा स्वतन्त्र उम्मेदवार कसैसँग प्रतिष्पर्धा नहुने दाबी गरेका हुन् ।
उम्मेदवार वडले नगरवासीको माग र चाहना अनुसार आफू दोस्रो पटक मेयरमा दोहोरिएको समेत प्रतिक्रिया दिएका छन् । उनले भने, ‘मेरो शुरूवाती कार्यकाल भनेको नगरको सबै वडाको भौतिक संरचना, कानून निर्माणमा बितेको छ । त्यसमाथि लामो समय कोभिडको खराब समयका बीच बितेको छ । अर्कोतिर प्रदेश सरकार संघीय सरकारको पनि सहयोग खासै थिएन । त्यस समय प्रतिकुल अवस्थामा पनि हामीले रातदिन नभनी काम गरेका छौँ । देशभरमा धनगढी उपमहानगरपालिका अब्बल छ । जुन कारणले पनि दोहोरिने मौका पाएको हुँ ।’
उनले अबको निर्वाचनमा आफू जितेको अवस्थामा विगतको अनुभवका साथै नयाँ योजनाका साथ अगाडि बढ्ने बताएका छन् । उनले आगामी योजना सुनाउँदै भने, ‘अब मेरो पहिलो उदेश्य गौरीफन्टा नाका व्यवस्थित गर्नु हो । धनगढी एयरपोर्टलाई व्यवस्थित गरेर जाने हो । धनगढी उपमहानगरलाई महानगर बनाउने हो । प्रत्येक घरमा एक प्राविधिक उत्पादन गर्ने योजनाको साथ अगाडि बढ्ने छु ।’
सुदूरपश्चिमको एक मात्रै धनगढी उपमहानगरपालिकाको मेयर र उपमेयरका लागि सोमबार सत्तारुढ गठबन्धनबाट वड र शान्ति अधिकारी क्षेत्रीले उम्मेदवारी दिएका हुन् । धनगढी चौराहाबाट बाजागाजा र र्याली सहित उनीहरू धनगढीस्थित मुख्य निर्वाचन अधिकृतको कार्यालय पुगेर मनोनयन दर्ता गराएका थिए ।
वड नेपाली काँग्रेसका केन्द्रीय सदस्य पनि हुन् भने अधिकारी लामो समय शिक्षण पेशामा सक्रिय छिन् । साथै २०७४ सालको निर्वाचनमा नेकपा माओवादी केन्द्रबाट उपप्रमुख पदमा पराजित भएकी थिइन् ।
