धनगढी उपमहानगरपालिकामा टावर लाइटमा राखिएको नेपालको झण्डा च्यातिएपछि पनि नफेरिएकोमा आलोचना बढेको छ ।

गत वर्ष फागुन ९ गते मुख्य चोकमा निर्माण गरिएको टावर लाइटमा झण्डा राखिएको थियो । तर, च्यातिएको त्यो झण्डा फेर्न चासो देखाइएको छैन ।

२ लाख ७५ हजारको बजेटमा तयारी गरिएको टावर लाइटको प्रदेश प्रमुख देवराज जोशीले उद्घाटन गरेका थिए ।

‘धनगढी उपमहानगरपालिकाको नेतृत्व त फेरियो तर क्याम्पस चोकको यो सानको रूपमा रहेको राष्ट्रिय झण्डा फेर्न फेरि नेतृत्व नै फेर्नु पर्ने त होइन होला’ एमाले कैलाली सचिव डेजी पाण्डेले च्यातिएको झण्डाको फोटो र भिडिओ राखेर फेसबुकमा लेखेका छन् ।

उनले उपप्रमुख कन्दकला रानालाई फोनमा झण्डा परिवर्तन गर्न आग्रह गरेको समेत जानकारी दिएका छन् ।