कैलालीको जोशीपुर गाउँपालिकाका अध्यक्ष चित्रबहादुर चौधरीले गाउँपालिकाको नेतृत्व आफूले सम्हाले पश्चात हालसम्म गरेका कामको प्रगति विवरण सार्वजनिक गरेका छन् । 

उनले जेठ ६ गते पद्भार ग्रहण गरिसकेपछि सात महिनासम्म सम्पादन गरिएका कामको प्रगति विवरण सार्वजनिक गरेका हुन । उनले छाडा गाईगोरुको व्यवस्थापन गरिएको, फोहोर मैला व्यवस्थापन गरिएको, सामुदायिक वनमा तारबार गरिएको उल्लेख गरेका छन् । यसैगरी, प्रत्येक चौकमा सोलार बत्ती र सीसी क्यामेरा जडान गरिएको, ह्वील चियर वितरण गरिएको जनाएका छन् ।

यस्तै सम्पूर्ण वडाहरुमा डिजिटल बोर्ड जडान, काढा नदीमा तटबन्ध निर्माण, किसानलाई दक्ष बनाउन नमूना कृषि फार्म सञ्चालन गरिएको जनाएका छन् । यसैगरी, लोक सेवा आयोग तयारी कक्षा सञ्चालन, युवाहरुलाई इलेक्ट्रिसियन तथा पलम्बर तालिम दिइएको जनाएका छन् । गाउँपालिकाले आगामी दिनहरुमा गर्नु पर्ने काम, कारबाहीका लागि उनले सुझाव दिनसमेत आग्रह गरेका छन् ।