शिवशिखर सहकारीमा जम्मा गरिएको बचत फिर्ता दिन बचतकर्ताहरुले माग गरेपनी सुनुवाई नभएको भन्दै उनीहरु थप आन्दोलित बन्ने भएका छन्। दुई महिनादेखि संघर्ष गर्दै आए पनि बचत फिर्ता पाएका नपाएपछि बचतकर्ता पीडित बनेका हुन्।

धनगढी शाखाबाट ६ हजार बढी बचतकर्ता पीडित बनेकाहरुको ६२ करोड ८३ लाख बचत फसेको उनीहरुको गुनासो छ। बचतकर्ता एवं शिवशिखर संघर्ष समितिका सदस्य समिरकुमार चौधरीले आफुहरुले जम्मा गरेको बचत फिर्ता गर्न सहकारीले नमानेपछि पीडितको बिचल्ली भएको बताउँदै थप संर्घषमा उत्रिने बताए। शिवशिखरले सुदूरश्चिमका विभिन्न जिल्लाबाट गरी एक अर्ब ६० करोड रकम संकलन गरेको छ।

शिवशिखरको महेन्द्रनगर, डडेल्धुरा, अत्तरिया, धनगढी लगायत शाखाकाम दैनिक बचत फिर्ता माग्नेको भीड लाग्दै आए पनि सहकारीले रकम फिर्ता गर्न सकिरहेको छैन्।यस्तै उता कञ्चनपुरको महेन्द्रनगरस्थित शिव शिखर बहुउद्देश्यीय सहकारी संस्थामा रकम जम्मा गरेका बचतकर्ता सम्बन्धित कागजातसहित जिल्ला प्रहरी कार्यालय पुगेका छन्। जिल्ला प्रहरी कार्यालयले सो सहकारीमा ठगी, रकम फिर्ता नभएको, रकम हिनामिनालगायतको विषयमा जाहेरी दरखास्त पेश गर्न बचतकर्तालाई सार्वजनिकरुपमै आह्वान गरेपछि उनीहरु जिल्ला प्रहरी कार्यालय पुगेका हुन्।

जिल्ला प्रहरी कार्यालयका प्रमुख प्रहरी उपरीक्षक कमल थापाले मङ्गलबार र बुधबार गरी सात सय ३७ बचतकर्ताले प्रहरीमा सम्बन्धित कागजात बुझाएको जानकारी दिए । “यो सहकारीका बिषयमा केन्द्रीय अनुसन्धान ब्युरोले पनि छानबिन गर्दैछ”, उनले भने, “कञ्चनपुरमा पनि प्रहरीले जाहेरी लिएर अनुसन्धान अघि बढाउने भएकाले कागजात विवरण पेश गर्न भनेका हौँ ।”जिल्ला प्रहरी कार्यालयको मूल गेटमा कागजात बुझाउने बचतकर्ताको बुधबारदेखि भीडभाड छ । प्रहरीका अनुसार उक्त सहकारीले महेन्द्रनगर शाखाबाट मात्रै रु २६ करोड निक्षेप सङ्कलन गरेको देखिएको छ । गत माघयता सहकारी सञ्चालक सम्र्पक बाहिर रहेका छन् । सहकारीले यहाँ सञ्चालन गरेको मार्टसमेत कर्मचारीले बन्द गरेका छन् ।

“यहाँ मार्टबाहेक अन्य घर जग्गा कारोबारमा लगानी भएको पनि देखिएन”, एसपी थापाले भने, “अब कागजात जम्मा पारेर सहकारी ठगीमा मुद्दा दायर गरेर अनुसन्धान अगाडि बढाउँछौँ ।” प्रहरीमा बचतकर्ताले फेसबुक, रकम जम्मा गरेका कागजात र नागरिकताको प्रतिलिपिलगायतका कागजात पेश गरिरहेका छन् ।यहाँ गत माघको तेस्रो साता लगानी डुब्ने चिन्ताले बचत रकम फिर्ता माग्दै बचतकर्ता आन्दोलित भएका थिए । उक्त संस्थामा दैनिक बचत, फिक्स बचतकर्तादेखि ठूलो रकम सेयर लगानी गरेका ग्राहकले आफ्नो लगानी डुब्न लागेको भन्दै रकम फिर्ता माग्न पहल गरिदिन आग्रह गर्दै आएका छन् ।