शनिबार बिहान गएको पहिरोले बझाङमा १७ घर बगाएको छ । केदारस्युँ गाउँपालिका वडा नम्बर ८, मल्लेसी गाउँमा पहिरोले घर बगाएको हो । पहिरोबाट ठूलो मानवीय क्षति भएको अनुमान छ । बिहान २ बजेतिर पहिरो गएको हो । पहिरो गएको गाउँमा प्रहरी सहितको उद्धार टोली बिहानै गएको भए पनि पुग्न सकेको छैन ।

मल्लेसी जाने बाटो खोलैखोला भएर जानु पर्ने र माथिबाट पहिरो खसिरहेका कारण उद्धार टोली त्यहाँ पुग्न नसकेको स्थानिय दिपक बोहराले बताए । बोहराले ५ जनाको शव भेटिएको र २८ देखि ३० जनासम्म बेपत्ता रहेको अपुष्ट जानकारी आएको बताए ।

उद्धार गर्न गएको प्रहरी टोलीले बाटो बनाएर घटनास्थल जाने प्रयास गरिरहेको डिएसपी गणेश बमले जानकारी दिए । यद्यपी त्यहाँ उद्धार टोली पुग्नका लागि अझै दुइ घण्टाभन्दा बढी लाग्न सक्ने उनले बताए । बझाङकी प्रतिनिधी सभा सदस्य आशा विकले हेलिकप्टर मार्फत उद्धार टोली घटनास्थल पठाउनका लागि प्रयास भैरहेको जानकारी दिएकी छन् ।