सुदूर पश्चिम लगानी तथा विकास सम्मेलन २०८० को तयारीमा जुटेको प्रदेश सरकारले आन्तरिक तथा बाह्य लगानी भित्र्याउन लगानीकर्ताहरुसंग भेटघाट र छलफल तिब्र पारेको छ । शनिवार काठमाण्डौंमा मुख्यमन्त्री कमल बहादुर शाह र गैर आवासीय नेपाली संघ अन्तर्राष्ट्रिय समन्वय परिषदका पूर्व अध्यक्षद्धय जीवा लामिछाने र उपेन्द्र महतोबीचमा लगानी तथा विकास सम्मेलनमा विषयमा छलफल भयो ।
छलफलका क्रममा मुख्यमन्त्री शाहले सुदूरपश्चिम प्रदेशमा लगानी गर्न एनआरएनएका पूर्व अध्यक्षद्धय लामिछाने र महतोसंग आग्रह गरे । प्रदेश सरकारले लगानीका लागि आवश्यक नीति र वातावरण बनाउने आश्वस्त पार्दै मुख्यमन्त्री शाहले सुदूर पश्चिममा लगानी गर्न आग्रह गरे । उनले पूर्व अध्यक्षद्धय लामिछाने र महतोलाई फागुन २३ र २४ गते धनगढीमा आयोजना गर्न लागिएको लगानी तथा विकास सम्मेलनमा सहभागी हुन आग्रह गरे ।
एनआरएनएका पूर्व अध्यक्ष एवं सानिमा गु्रपका अध्यक्ष लामिछानेले सुदूरपश्चिममा आफ्नो समूह लगानी गर्न तयार रहेको र त्यसका लागि आवश्यक वातावरण बनाउन प्रदेश सरकारसंग आग्रह गरे । एनआरएनएका पूर्व अध्यक्ष महतोले पनि सुदूरपश्चिममा लगानी गर्ने प्रतिबद्धता गरे । मुख्यमन्त्रीको निमन्त्रणा स्वीकार गर्दै पूर्व अध्यक्षद्धय लामिछाने र महतोले लगानी तथा विकास सम्मेलनमा सहभागी हुने जानकारी गराए ।
लगानी तथा विकास सम्मेलनका लागि अन्तर्राष्ट्रिय संयोजक हिक्मत थापाको संयोजनमा आयोजित छलफलमा भौतिक पूर्बाधार विकास मन्त्री प्रकाश बहादुर देउवा र आर्थिक मामिला तथा योजना मन्त्री नरेश कुमार शाही समेत सहभागी थिए । यसअघि मुख्यमन्त्री र गैर आवासीय नेपाली संघका पूर्व अध्यक्ष शेष घलेबीच पनि लगानी तथा विकास सम्मेलनका सम्बन्धमा छलफल भएको थियो ।
सम्बन्धित वर्गका समाचारहरू
