नेपाली कांग्रेसका सहमहामन्त्री तथा प्रतिनिधिसभा सदस्य बद्री पाण्डेले प्रधानमन्त्री पुष्पकमल दाहाल प्रचण्डलाई अब एक वर्षको समयसीमा मात्रै रहेको बताएका छन् । आज कैलालीको धनगढीमा प्रेस युनियनले आयोजना गरेको पत्रकार सम्मेलनमा उनले गठबन्धनमा भएको सहमति अनुसार प्रचण्डसँग एक वर्ष मात्रै समय रहेको उल्लेख गरेका हुन् ।

‘हामीलाई आधिकारिक जानकारी त दिइएको छैन, तर, सुन्नमा आए अनुसार प्रचण्डलाई दुई वर्षको समय छ’ उनले भने ‘अब एक वर्ष मात्रै उहाँसँग छ । अझै तदारुकताका साथ अगाडी बढ्नु पर्छ ।’ उनले पहिलो चरणमा भएको सहमति कार्यान्वयन गर्नु पर्नेमा जोड दिए । ‘प्रचण्ड, माधव कुमार नेपाल र शेरबहादुर देउवा बिच सहमतिको आधारमा प्रधानमन्त्री बन्ने सहमति भएको सुनेका छौँ’ उनले भने ‘माधव नेपाललाई पनि आश्वासन दिइएको थियो भने बन्न दिनु पर्छ शेरबहादुर देउवा पनि बन्नु पर्छ ।’

वर्तमान सरकारका ठुला काण्ड सुन्न परेको बताउँदै उनले त्यसलाई उपलब्धिका रूपमा चित्रण गरे । उनले अघिल्लो कार्यकालमा प्रधानमन्त्री रहेका केपी ओलीबाट ठुलो काण्डहरू भएको आरोप लगाए । ‘अहिले ठुला काण्ड सुन्नु परेको छैन । प्रधानमन्त्री र मन्त्रीले काण्ड गरेको सुन्न परेको छैन’ उनले भने, ‘केपी ओली प्रधानमन्त्री काण्ड भएको बेला धेरै सुनियो । अहिले एनसेलकाण्ड बाहेक अरू छैन । यसलाई पनि व्यवस्थापन गर्ने गरी काम गरिरहेको छ ।’

अहिले अर्थतन्त्रमा केही सुधार भए पनि अरू सूचकहरूमा परिवर्तन आउन नसकेको उनको भनाइ थियो । पुँजीगत खर्च अझै बढ्न नसकेको उनले बताए ।अर्थतन्त्र कमजोर हुँदा रुसको सेनामा पनि गैर कानुनी रूपमा जानु पर्ने बाध्यता आएको उनको भनाइ थियो । सरकारले एक वर्षको यो ठाउँमा उभिँदा गम्भीर समीक्षा गर्नु पर्नेमा जोड दिए । उनले अहिले मन्त्री हेरफेर गर्ने विषय उपयुक्त नभएको बताए ।

‘मन्त्री फेर्ने कुरा उचित होइन । तीन पटक प्रधानमन्त्री फेर्ने भनेको छ तीन पटक प्रधानमन्त्री फेर्दा मन्त्री ६ पटक फेर्ने कुरा ठिक भएन । प्रधानमन्त्री फेर्दा मन्त्री बदलिने कुरा ठिक हो’ उनले भने । साझा म्यान्डेटलाई खण्डित हुन नदिने गरी पुरै कार्यकाल गठबन्धनको सरकार टिकाउनु पर्नेमा उनले जोड दिए । ‘मिश्रित राजनैतिक प्रणालीबाट पनि स्थित दिनको लागि भएको सहमति कार्यान्वयन गर्नु पर्छ’ उनले भने ‘कांग्रेसले सानातिना चलखेलमा लाग्नु हुँदैन ।’ नेपाली कांग्रेसमा पनि अहिले सुस्तता आएको उनको भनाइ थियो । उनले भने, ‘हाम्रो पार्टीमा पनि कामलाई पर धकेल्ने कुरा बढिरहेको छ । कोषाध्यक्ष पद खाली छ । केन्द्रीय सदस्य पद मनोनीत हुन वाकी छ । महासमिति बैठक नियमित बस्न सकिरहेको छैन ।’

पार्टीको दोस्रो बरीयतामा शेखर कोइलालाई स्थान दिन उपयुक्त रहको पाण्डेले बताए । ‘परम्परा नै स्थापित भएको छ । शेखर कोइरालाले दोस्रो वरीयता प्राप्त गर्नुपर्छ’ उनले भने, ‘शेखर कोइरालालाई छेउमा राख्दा सभापति पूर्ण हुनुहुन्छ । सभापतिले उहाँलाई दोस्रो वरियतामा दिनु पर्छ । यो सभापतिको विवेकले गर्ने निर्णय हो ।’ पाण्डे शिक्षा स्वास्थ्य तथा सूचना प्रविधि समितिको नेतृत्वमा भूकम्पको क्षति र त्यसले शिक्षा र स्वास्थ्य संस्थामा पुगेको क्षतिको विवरण हेर्ने र अध्ययन गर्न सुदूरपश्चिम आएका थिए ।