प्रहरीले कैलाली र कञ्चनपुरबाट एक लाख बढी मूल्यका भन्सार छलिका सामान बरामद गरेको छ । धनगढी उपमहानगरपालिका २ कृष्णनगरमा अवैध रुपमा भारतबाट भन्सार छली ल्याएका अन्दाजी ६५ हजार ७ सय ६० मूल्य बराबरको सुर्ति, तमाखु, चिनी, सोडा, चामल, आन्टिलगायतका सामान बरामद गरिएको हो ।

धनगढी उपमहानगरपालिका ३ पुरानो भन्सार रोडबाट अन्दाजी ४९ हजार ५ सय मूल्य बराबरको सिमला मिर्च, हरियो मटर, प्याज, कागती लगायतका सामान बरामद गरिएको जिल्ला प्रहरी कार्यालय कैलालीले जनाएको छ ।

त्यस्तै, कञ्चनपुरको दोधारा चाँदनी नगरपालिका १ चक्कि बजारबाट अन्दाजी ४ हजार २ सय ५० मूल्य बराबरको चिनी बरामद गरिएको छ । बुधवार साँझ प्रहरी गस्ती टोलीले बेवारिसे अवस्थामा फेला पारी उक्त सामान नियन्त्रणमा लिएको जिल्ला प्रहरी कार्यालय कञ्चनपुरले बताएको छ ।