नागरिक उन्मुक्ति पार्टीका संरक्षक रेशमलाल चौधरी पक्षीय सांसदसँगै काँग्रेस पनि अदालत जाने भएको छ। न्यायको लडाइँका लागि दुबै पक्ष अदालत जाने भएका हुन्। उनीहरु हिजो मंगलबार साँझ पत्रकार सम्मेलन गरेरै यस्तो चेतावनी दिएका हुन्। मुख्यमन्त्रीको सरकारी निवासमा पत्रकार सम्मेलन गर्दै दुवै दलहरूले मुख्यमन्त्री नियुक्तिमा थप समय दिएर असंवैधानिक काम गरेको भन्दै न्यायालय जाने बताए। मंगलबार प्रदेश प्रमुख नजिर मियाँले ६ गते साँझ ५ बजे सम्मको लागि मुख्यमन्त्रीमा दाबी गर्न थप समय दिएका थिए।
२ गते मुख्यमन्त्रीमा दाबी गरेका नागरिक उन्मुक्ति पार्टीका दुबै सांसदहरूको दाबी अस्वीकृत गर्दै प्रदेश प्रमुखले नयाँ समय दिएका हुन्।आइतबार नागरिक उन्मुक्तिका लक्ष्मण किशोर चौधरी र कैलाश चौधरीले मुख्यमन्त्रीमा दाबी पेस गरेका थिए। लक्ष्मण किशोर रेशम पक्षका सांसद हुन् भने कैलाश अध्यक्ष रन्जिता श्रेष्ठ पक्षका सांसद हुन्।
दुबै दाबी प्रदेश प्रमुखले।खारेज गरेर संविधानको १६८ को २ बमोजिम पुनः आह्वान गरेका थिए। प्रदेश प्रमुखको उक्त कदम विरुद्ध मुख्यमन्त्रीमा दाबी पेस गरेका लक्ष्मण किशोर चौधरीले अदालत जाने बताए। चौधरीले प्रदेश प्रमुखले कानुन विपरीत सरकार निर्माणको समय लम्ब्याएको भन्दै आपत्ति समेत जनाए। उनले सबै प्रक्रिया पुरा हुँदा पनि आफ्नो दाबी खारेज गरेको भन्दै असंवैधानिक काम भएको दाबी गरे।
कांग्रेस संसदीय दलका नेता समेत रहेका प्रदेश सरकारका मुख्यमन्त्री कमलबहादुर शाहले पनि प्रदेश प्रमुखबाट असंवैधानिक काम भएको भन्दै न्यायिक लडाइँ लड्ने बताए। प्रदेश प्रमुखले समय लिएर फेरि समय थप गर्नुभयो त्यो असंवैधानिक काम भएकाले न्यायालय जाने उनले बताए। उनले नेकपा एकीकृत समाजवादीले समेत नैतिकता देखाउन नसकेको बताए।
पछिल्लो समय सुदूरपश्चिममा मुख्यमन्त्रीको विषयलाई लिएर अनेक खेलहरु भइरहेका छन्। एकीकृत समाजवादीले मुख्यमन्त्रीका लागि संसदीय दलका नेता दीर्घबहादुर सोडारीलाई अघि सार्ने निर्णय गरेको भए पनि नेकपा एमालेले भने उनको विकल्प खोज्नुपर्ने भन्दै अहिले छलफल जारी छ।
सम्बन्धित वर्गका समाचारहरू
