भारतीय फिल्मको चर्चित जोडी विजय वर्मा र तमन्ना भाटिया यतिबेला विवाहको खबरले चर्चामा छन् । उनीहरुले विलासी अपार्टमेन्ट समेत खोजिरहेका छन् । यद्यपि दुवैले विवाहबारे चलेका गसिपबारे आधिकारिक बताएका छैनन् । यो जोडी केही समयदेखि डेटमा छ । सार्वजनिक स्थानमा उनीहरु धेरैपटक एकसाथ देखिएका छन् ।

हालैको एक अन्तर्वार्तामा विजयले आफू र तमन्नाको सम्बन्धको बारेमा कुरा गरे । जब आफूहरूको डेटिङको खबर बाहिर आयो तब मानिसको प्रतिक्रियाले छक्क तुल्याएको उनको भनाइ थियो । म्यासेबल इण्डियासँग कुरा गर्दै विजयले भने, ‘मेरो प्रेम जीवनमा मानिसको चासो देखेर म छक्क परें तर अब बानी परिसकेको छ ।’ आफूहरूको सम्बन्ध बलियो र मायालु रहेको भन्दै उनले यसबारे प्रशंसकको ध्यान तानिएको बताए ।

‘लस्ट स्टोरीज २’ को सुटिङपछि विजय र तमन्नाको प्रेम सम्बन्ध सुरु भएको थियो । सुटिङका क्रममा दुवैजना सहकलाकार मात्र थिए र सेटमा एकअर्कालाई व्यावसायिक रूपमा व्यवहार गर्थे । सुटिङ सकिएपछि विजयले तमन्नालाई डेटमा बस्न आग्रह गरे र विस्तारै दुवै नजिकिए । तमन्नाले गत वर्ष जुनमा एक अन्तर्वार्तामा यो सम्बन्धको औपचारिक पुष्टि गरेकी थिइन् । आफूले विना कुनै एटिच्युड तमन्नालाई अप्रोच गरेको र उनको साथमा राम्रो महसुस गरेको पनि उल्लेख गरेका छन् । तमन्नाले आफूलाई निकै ख्याल राख्ने गरेको उनले बताइन् ।

कामको कुरा गर्दा, तमन्ना भाटिया चाँडै अविनाश तिवारी र जिमी शेरगिलसँग ’सिकन्दर का मुकद्दर’मा देखिनेछिन् । नीरज पाण्डेले निर्देशन गरेको यो फिल्म एक्सन थ्रिलर हो । फिल्ममा दिव्या दत्त र जोया अफरोजको पनि महत्वपूर्ण भूमिका छ । यससँगै विजय ‘मिर्जापुर ३’ मा देखिएका छन्, ‘मटका किंग’ र ‘सूर्य २३’ जस्ता फिल्ममा देखिनेछन् ।