कैलालीका रिक्सा चालक व्यवसाय नचलेपछि संकटमा परेका छन्। तीन महिनासम्म रिक्सा चलाउन नपाएका रिक्सा व्यवसायी रिक्सा चले पनि यात्रु नपाएपछि चिन्तामा परेका हुन् सिद्धि विनायक यातायात प्रालि टीकापुरका महासचिव रामशरण रेग्मीका अनुसार कैलालीमा करिब १० हजार रिक्सा छन्। रिक्सा व्यवसाय नचलेपछि १० हजार नागरिकको रोजीरोटी संकटमा परेको रेग्मी बताउँछन्। ‘तीन महिना पूर्णरूपमा रिक्सा बजारमा आउन सकेनन्, आजभोलि चलाउन खोजेका छन् तर यात्रु छैनन्। रिक्सा चालकको पेशा संकटमा परेको छ’, उनले भने।
कोरोना भाइरस संक्रमणले मुलुक नै अस्तव्यस्त भएको छ। संक्रमण रोकथाम तथा नियन्त्रणका लागि गरिएको लकडाउनले सबैभन्दा बढी असर सामाजिक र आर्थिक क्षेत्रमा परेको छ। कैलालीको जानकी गाउँपालिका–६ का मंगल चौधरीले गएको माघ महिनामा इलेक्ट्रोनिक रिक्सा किने। माघ १० गते छ लाख २२ हजार रुपैयाँ ऋण गरेर रिक्सा किनेका मंगलले दुई महिना राम्रोसँग रिक्सा चलाए। दुई महिनापछि चैत ११ गते देश नै लकडाउन भयो। ‘असार महिनादेखि लकडाउन केही खुकुलो भएपछि रिक्सा बजारमा ल्याउन थालेँ’, मंगलले भने, ‘ऋणमा रिक्सा किनेँ तर चलाउनै पाइनँ। बैंकले ब्याज र किस्ता तिर्न ताकेता गरेको छ। मलाई त रिक्सा किनेर तनाव भयो, अब ऋण कसरी तिर्नु ?’
जानकीकै रवीन्द्र नेपालीलाई पनि रिक्सामा यात्रु नपाउँदा समस्या भएको छ। उनलाई पनि ऋण कसरी तिर्ने, परिवार कसरी पाल्ने भन्ने चिन्ता बढेको छ। ‘तीन महिनापछि रिक्सा चलाउँदा पनि यात्रु पाइन्न, हिजो त दिनभरि यात्रु कुरेँ, एक जना पनि पाइनँ’, रवीन्द्रले भने, ‘घर पनि कसरी चलाउने ? यही पेशाबाट परिवार पालेको थिएँ, अब त भोकमरी होला जस्तो छ।’ रिक्सा चालक राजकुमार चौधरीले पनि दुई वर्षअघि ऋण गरेर रिक्सा किने। उनले दुई वर्ष राम्रो कमाइ गरे। रिक्सा किन्दाको ऋण दुई वर्षमै चुक्ता गरे, तर कोरोना भाइरस संक्रमण फैलिएपछि रोकथामका लागि भएको लकडाउनको असरले दैनिकी भने चल्न मुस्किल भएको छ । ‘दैनिक दुई हजारदेखि चार हजा रुपैयाँसम्म कमाइ हुन्थ्यो, अब नियमित बचत गर्छु र घर चलाउँछु भन्ने सोचेको थिएँ’, राजकुमार भन्छन्, ‘तीन महिनामा घर खर्चमा रु ५० हजार ऋण लागिसकेको छ, न त रिक्सा चल्छ, जीवन तनावमय भएको छ।’
रिक्सा चालक इन्द्र विक पनि यात्रु नपाएर दिक्क हुनुहुन्छ। उनले पनि ऋणमा किनेको रिक्सा राम्रो नचलेपछि रिक्साचालक पेशाबाट विस्थापित हुने अवस्था आउने चिन्ता बढेको बताए। रिक्सा चालकलाई कोरोनाको डरले निर्वाध रिक्सा चलाउन पनि कठिन भएको छ। रिक्सा चालक गुजारा गर्नै गाह्रो भएको गुनासो गर्न थालेका छन्। रिक्सा चालक जनक परियारले यही पेशाबाट परिवार पालेकालाई जीवन निर्वाह गर्न कठिन भएको बताए। ‘शुरुमा त कोरोना संक्रमण होला भन्ने डर थियो, अब त भोकै मरिन्छ भनी डर हराएको छ’, जनकले भने, ‘यात्रु कुरेर बस्छौँ, यात्रु पाए पनि एक जना मात्रै बस्न खोज्छन्, यात्रु पनि धेरै जनासँगै बस्न चाहँदैनन्, अनि कसरी आम्दानी हुनु ? पेट्रोल हाल्न कठिन भएको छ।’
सिद्धि विनायक यातायात प्रालिका महासचिव रेग्मी कोरोना भाइरस संक्रमणको असर सबैतिर परेकाले रिक्सा चालकलाई केही समय ऋणको किस्ता नमाग्न, ब्याज मिनाहा गर्न माग गरेको बताउँछन्। ‘हामीले स्थानीय सरकारलाई ब्याज मिनाहाका लागि बैंकसँग पहल गरिदिन अनुरोध गरेका छौँ। रिक्सा चालक ब्याज मिनाहा नभए पेशाबाट विस्थापित हुने निश्चित छ’, उनले भने।
सम्बन्धित वर्गका समाचारहरू
