अख्तियार दुरुपयोग अनुसन्धान आयोगले धनगढी उप–महानगरपालिकाको कार्यालयमा छापा हानेको छ । अख्तियार दुरुपयोग अनुसन्धान आयोग महेन्द्रनगरको टोलीले उप–महानगरपालिकामा आज छापा हानेर राहतको चामल लगायतका सामाग्री खरिद प्रक्रियाका सबै कागजात कब्जामा लिएको हो ।

राहतका सामाग्री खरिद प्रक्रियामा भएको अनियमितता बारे छानविन गर्न सबै कागजपत्र नियन्त्रण लिईएको अख्तियारका प्रवक्ता टोपबहादुर विष्टले बताए । 

धनगढी उप–महानगरपालिकाले दुई करोड ६१ लाखमा राहत सामाग्री खरिदका लागि धनगढीकै ठाकुर ट्रेडलाई ठेक्का दिएको थियो । सप्लायर्सले आपूर्ति गरेको चामल कुहिएको भेटिएपछि विभिन्न वडाका स्थानीयले राहतको चामल फिर्ता गरेका थिए ।