धनगढीका लागि टाटा मार्टसको आधिकारिक बिक्रेता सिप्रदी प्रा.लिको ग्यारेजको प्रदुषित पदार्थ खुल्ला रुपमा छोड्दा स्थानीय समस्यामा परेका छन् । ग्यारेजबाट निस्कने पेट्रोलियम जन्य फोहर, मोबिल लगायतका प्रदुषित सामाग्री खुला छोड्दा धनगढी उपमहानगरपालिका १३ चटकपुरका स्थानीयको खेती उजाड भएको छ । स्थापना भएदेखि खुल्ला रुपमा पेट्रोलियम पदार्थ बाहिर स्थानीयको खेतमा जादा उब्जनी हुन छोडेको स्थानीयको आरोप छ ।
सिप्रदी प्रालिको चरम लापरबाहीले दश रोपनी खेतमा विगत चार बर्षदेखि उब्जनी हुन छोडेपछि वडा कार्यालयलाई पटक पटक जानकारी गराउँदा पनि कुनै सुनवाई नभएको स्थानीयको आरोप छ । सिप्रदीको सोरुमबाट निस्कने पेट्रोलियमजन्य फोहर सिधै किसानको खेतमा जाने गरेको छ । सो रुममा मर्मतको लागि आउने गाडीहरुबाट निस्केको फोहर सिधै धान खेतमा मिसिने गर्छ । यसरी किसानको खेतमा बर्षेनी ठुलो क्षति पुर्याउने गरेको छ ।
दुई दुई पटक रोपाई गरेर पनि उब्जनी नहुने र धान उम्रन नपाउदै मर्ने गरेको किसानको गुनासो छ । यसरी चार बर्षदेखि पेट्रोलियमजन्य फोहर खेतमा आउन थालेपछि किसानलाई सास्ती भएको छ । लगातार ४ बर्षदेखि पेट्रोलियमजन्य फोहर खेतमा आईरहेको स्थानीय रन्जित शाहले बताए । खेतमा लगायतको धान बर्षै पिच्छे बढ्न नपाउँदै मर्ने गरेको गुनासो पोखे । उनले फोहर व्यवस्थापनको लागि पहल गर्दा समेत सिप्रदीले व्यवास्ता गरेको सुनाए । यता वडा नम्बर १३ का वडाध्यक्ष विजयराज जोशीले स्थानीय र सिप्रदी बिचको समस्या भएका कारण आफुले केही गर्न नसक्ने प्रतिक्रिया दिए । उनले भने–‘दुई पक्ष बसेर समस्या समाधान गर्ने हो हाम्रो भुमिका केही हुदैन् ।’ वडाध्यक्ष जस्तो जिम्मेवार व्यक्तीले गैरजिम्मेवार प्रतिक्रिया दिए ।
कैलालीका प्रमुख जिल्ला अधिकारी यज्ञराज बोहराले वडा कार्यालयको जिम्मेवारी हुने बताए । उनले जिल्ला प्रशासन कार्यालयमा लिखित निवेदनका आधारमा प्रशासनले सिप्रदी प्रालिलाई कारबाही गरी पीडितलाई क्षतिपुर्ति उपलब्ध गराउन सक्ने बताए । यस बिषयमा सिप्रदीको शाखा कार्यालय धनगढीमा बुझ्न जादा कार्यकारी अधिकृत शम्भु दाहालले आफ्नो कार्यालयबाट गल्ती भएको र चाडै समाधान गर्ने स्वीकार गरे । उनले यस बिषयमा चाडै केन्द्रिय कार्यालयमा खबर गरी समस्या समाधान गर्ने बताए ।
