सेती प्रादेशिक अस्पताल धनगढीमा उपचाररत कोरोना संक्रमित महिलाको मृत्यु भएको छ। धनगढी उप- महानगरपालिका ५ की ५७ बर्षीया संक्रमित महिलाको आज साँझ उपचार कै क्रममा सेती प्रादेशिक अस्पतालमा मृत्यु भएको अस्पतालका सूचना अधिकारी दिलिप श्रेष्ठले जानकारी दिए।

मृतकलाई भदौ १७ गते कोरोना पुष्टि भएको थियो । कडा खालको लक्षण देखिएपछि १९ गते अस्पतालमा भर्ना गरिएको थियो। मृतकको भेन्टिलेटरमा राखेर उपचार भैरहेको थियो । संक्रमितको प्लाज्मा थेरापीमार्फत उपचार भएको थियो ।

मृतकलाई रेम्डेसिभिर औषधि समेत प्रयोग गरिएको सुचना अधिकारी श्रेष्ठले बताए ।  योसँगै सुदूरपश्चिममा संक्रमित मृतकको संख्या १५ पुगेको छ ।