दैनिक छाक टार्न मुस्किल भएपछि कोरोना महामारीकै बीच सुदूरपश्चिमबाट दैनिक आठ सयको हाराहारीमा नेपाली भारततर्फ लागेका छन् । स्वदेशमा रोजगारी नभएपछि मजदुरीका लागि उनीहरु भारत गएका हुन् । नेपालीहरु भारत जान कोरोना संक्रमणको जोखिम भए पनि सुदूरका पहाडी जिल्लामा जीवन चलाउन सहज नभएपछि उनीहरु भारत फर्किन लागेका हुन् ।
सीमावर्ती सहर गौरीफन्टा र वनबासाबाट उनीहरु भारतीय बसमा विभिन्न गन्तव्यतर्फ लाग्ने गरेका छन् । यसअघि प्रहरीले भारतबाट आउने-जानेहरुको तथ्याङ्क राख्ने गरेको थिएन । कोरोना महामारीपछि तथ्याङ्क राख्न सुरु भएको हो । कैलालीको गौरीफन्टा, कञ्चनपुरको गड्डाचौकी, दार्चुला र बैतडीका सीमानाकाबाट दैनिक आठ सयको हाराहारीमा नेपालीहरु भारत प्रवेश गरेका हुन् ।
भारतमा कोरोना संक्रमणको अवस्था भयावह भए पनि नेपालमा पेट पाल्नै मुस्किल भएको उनीहरुको दुखेसो छ । भारतमा कोरोना महामारी सुरु भएपछि उनीहरु नेपाल फर्किएका थिए । लामो समयसम्म पनि कोरोना महामारीको अन्त्य नभएपछि उनीहरु पुन: भारत फर्किन बाध्य भएका हुन् ।
सुदूरपश्चिमका पहाडी जिल्ला र कर्णालीका लाखौं नेपाली भारतमा मजदुरी गर्दै आएका छन् । पहाडी भेकमा अन्न उत्पादन नहुने र स्थानीयस्तर रोजगारीका अन्य विकल्पसमेत नभएपछि सुदूर र कर्णालीका बासिन्दालाई मजदुरीको पहिलो विकल्प भारत बनेको हो ।
सुदूरपश्चिम प्रदेश प्रहरी कार्यालयका अनुसार कात्तिक १ देखि १६ गतेसम्म १२ हजार ७ सय ६३ नेपाली भारत प्रवेश गरेका छन् । जसमा २४ सय ५० महिला र १४ सय ५ बालबालिका पनि छन् । सुदूर र कर्णालीका विपन्न नागरिक परिवारसहित भारत पस्ने गरेका छन् । पछिल्लो १६ दिनकै अवधिमा ८ हजार ११४ जना भारतबाट स्वदेश फर्किएको सुदूरपश्चिम प्रदेश प्रहरी कार्यालयका एसएसपी मुकेश सिंहले जनाएका छन् ।
सरकारले गाउँमा रोजगारी सिर्जना गर्न नसक्दा ज्यान जोखिममा राखेर उनीहरु भारत पस्न बाध्य छन् । कैलालीको गौरीफन्टा नाकाबाट भारत जानेको संख्या अधिक छ । भारत पसेका नेपालीहरु सिमला, बैंगलुरु, नयाँदिल्ली, मुम्बई लगायत सहरमा मजदुरीका लागि पुग्ने गर्छन् । नेपालमा तीन तहका सरकार भइसक्दा पनि स्वदेशमै रोजगारीको सिर्जना हुन सकेको छैन । यसै कारण पनि सुदूर तथा कर्णालीका लाखौं बासिन्दा मजदुरीका लागि भारत जान बाध्य छन् ।
सम्बन्धित वर्गका समाचारहरू
