कोरोना भाइरसको संक्रमण तत्काल रोकथाम हुने अवस्था नदेखेर रोजगारी तथा अध्ययनका लागि भारत गएका नेपाली ठूलो संख्यामा फर्कन थालेपछि कैलालीका स्थानीय तहहरू उनीहरूको व्यवस्थापनमा जुटेका छन् । अहिले कैलालीका स्थानीय तहहरू क्वारेन्टाइन व्यवस्थापन तथा सीमासम्म पुगेका आफ्ना पालिकाका नागरिकको उद्धारमा व्यस्त देखिन्छन् ।
कैलालीको घोडाघोडी नगरपालिकाका प्रमुख ममताप्रसाद चौधरी दैनिकजसो सीमामा रहेका आफ्ना नागरिकलाई लिन नगरपालिकाले सवारीसाधन पठाउने गरेको बताउँछन् । ‘हामी आफ्ना नागरिक ल्याउन र उहाँहरूलाई क्वारेन्टाइनमा व्यवस्थापन गर्न लागिरहेका छौं,’ उनले भने, ‘वडावडामा क्वारेन्टाइन बनाएर व्यवस्थापनमा वडाध्यक्ष तथा सरोकारवाला साथी खट्नुभएको छ ।’
बन्दाबन्दीका कारण बन्द रहेका नगरपालिकाभित्रका विद्यालयलाई क्वारेन्टाइनका रूपमा विकास गरेर स्थानीय युवा स्वयंसेवकलाई परिचालन गराएर भारतबाट आउनेलाई कम्तीमा २ हप्ता क्वारेन्टाइनमा राखेर स्वास्थ्य परीक्षणपश्चात् घर पठाउने गरिँदै आएकामा अब भने कम्तीमा ३ क्वारेन्टाइनमा राख्ने व्यवस्था गरिएको नगर प्रमुख चौधरीले बताए । अहिले नगरपालिकाको क्वारेन्टाइनमा ४२० जनालाई राखिएको र यो संख्या वृद्धि हुँदै जाने निश्चित भएको र व्यवस्थापनमा केही चुनौती रहेको नगर प्रमुख चौधरीले बताए ।
कैलालीको गौरीगंगा नगरपालिका प्रमुख भीमबहादुर देउवा नगरपालिकाले नेपाल–भारत सीमासम्म पुगेका नागरिक लिन नियमित सवारी साधन पठाउने गरेको बताउँछन् । ‘शुरूआती समयमा पालिकाभित्रका २ स्थानमा मात्र क्वारेन्टाइन बनाएर भारत तथा देशभित्रकै अन्य स्थानबाट आएकालाई राखिएको भएता पनि पछिल्लो समय भारतबाट फर्कनेहरूको संख्या बढेपछि हरेक वडामा क्वारेन्टाइन बनाएर व्यवस्थापन गर्नतर्फ लागेका छौं,’ नगर प्रमुख देउवाले भने । भारतबाट आउने कोहीलाई पनि क्वारेन्टाइनमा बसाउनुपर्ने नभए संक्रमणको खतरा बढ्न सक्ने भन्दै जनप्रतिनिधि तथा स्थानीय युवा क्लब मार्फत चेतना जगाउने काम पनि गरिरहेका कारण तथा सामाजिक सञ्जालमा सम्पर्क नम्बर राखिदिएका कारण सीमामा आउने पालिकाका जनताले सोझै सम्पर्क राख्न सक्ने भएको हुँदा व्यवस्थापनमा सहज भएको नगर प्रमुख देउवा बताउँछन् ।
कोरोना संक्रमण फैलिन नदिन नगरपालिकाभित्र विभिन्न १० ठाउँमा क्वारेन्टाइन बनाएर भारतलगायत बाहिरबाट आउनेहरूको व्यवस्थापनमा जुटिरहेको कैलालीको लम्कीचुहा नगरपालिकामा अहिलेसम्म ६३० जना क्वारेन्टाइनमा छन् । नगरपालिकाका प्रमुख महादेव बजगाईं यो संख्या अझै बढ्ने बताउँछन् । भारतबाट नेपाल आउने नेपालीको संख्या दिनप्रतिदिन बढेका कारण व्यवस्थापनमा केही चुनौती भएको भएपनि सबैको सहयोगमा सही ढंगले व्यवस्थापन गरिँदै आएको प्रमुख बजगाईंले बताए । ‘आजभोलि दैनिक नेपाल–भारत सीमामा आएका आफ्ना नागरिकलाई ल्याउनमा व्यस्त रहेको र अझै केही दिन एकदमै ठूलो संख्यामा नागरिक स्वदेश आउने भएकाले उहाँहरूको व्यवस्थापन मुख्य चुनौतीका रूपमा देखापर्ने भएकाले यस विषयमा प्रदेश तथा केन्द्र सरकारले पनि ठोस कदम चाल्नुपर्ने नत्र स्थिति भयावह हुनसक्छ,’ नगर प्रमुख बजगाईंको भनाइ छ । स्थानीय तहहरूले आफ्नो क्षमताअनुसार कोरोना रोकथाम तथा नियन्त्रणका लागि काम गरिरहेको भएपनि स्थानीय तह र केन्द्र सरकारबीचको सरकार प्रदेश सरकारले पहलकदमी नलिएको नगर प्रमुख बजगाईंले बताए । रासस
सम्बन्धित वर्गका समाचारहरू
