सुदुरपश्चिम प्रदेश सभा सदस्य अम्बिकुमारी थापाले प्रदेश सरकारले बजेटमा रजाई गर्न प्रदेश योजना आयोग गठन नगरेको आरोप लगाएकी छिन् । प्रदेश सभाको विशेष समयमा वोल्दै थापाले प्रदेश सरकारले बजेटमा रजाई र भ्रष्टाचार गर्नकै लागि प्रदेश योजना आयोग गठन नगरेको आरोप लगाएकी हुन् । अढाई बर्षसम्म गठन नगरिएको प्रदेश योजना आयोग छिटोभन्दा छिटो गठन गर्न उनले माग गरिन् । ‘अढाई बर्षसम्म किन बनाउन सकेनौ । हामी योजना बनाउन पाउदैनौ । हामी कार्याकर्तालाई दिने बजेट दिन पाउदैनौ भनेर नगरेको जस्तो छ ।’ प्रदेश सभा सदस्य थापाले भनिन्—‘छिटोभन्दा छिटो प्रदेश योजना आयोग गठन होस ।’

भारतमा अलपत्र नेपालीको उद्धारको काममा पनि प्रदेश सरकारले प्रभावकारी काम गर्न नसकेको थापाले आरोप लगाईन् । सामाजिक विकास मन्त्री कृष्णराज सुवेदीले संसदमा कोरोनाको वारेमा जानकारी दिदा झुटो बोलेको भन्दै उनले भनिन्—‘मन्त्री ज्युले प्रदेश सरकारले थुप्रै व्यवस्था गरेको भन्नु भएको । कतिलाई यातायातको व्यवस्था गर्नुभयो । कतिलाई खाना खुवाउनुभयो । त्यसको वारेमा मिडियामा देखेका छैनौ सुनेका छैनौ । सरकारभन्दा पनि व्यक्तीगत रुपमा गरेका छन् । रोष्टममा झुट वोल्न पाईदैन । प्रदेशवासीहरुलाई यसको वारेमा जानकारी गराउनुहोस ।’

उनले प्रदेश सरकार प्रति आशाको आशा अनुसारको काम हुन नसकेको भन्दै सरकार जनताप्रति उत्तरदायी नभए र आफ्नो कर्तव्य नवुझेमा ठुलै दुर्घटना हुन सक्ने चेतावनी दिईन् ।  मंगलवारको संसद वैठकमा आर्थिक मामिला तथा योजना मन्त्री झपट वोहोराले विवादास्पद अभिव्यक्ती दिएको भन्दै प्रदेश सरकारका मन्त्रीले जिम्मेवार भएर वोल्नु पर्ने बताईन् । संघीय सरकारले गरेको निर्णयको खुशी सहित स्वागत गरेको भन्दै उनले मन्त्रीले गैर जिम्मेवारी रुपमा वोल्नु आपत्तिजनक भएको जिकिर गरिन् । प्रदेश सरकारले विगतका कामहरुको समीक्षा गर्न जरुरी रहेको भन्दै प्रदेश सभा सदस्य थापाले निति तथा कार्यक्रममा लेखिएका कुराहरु अक्षरमा सुन्दर रहेको तर कार्यान्वयनको पाटो जरुरी रहेकोमा जोड दिईन् ।